ལྷོ་རོང་རྫོང་ཤིང་རོང་ཤང་བམ་སྟེང་གྲོང་ཚོར་བཅའ་སྡོད་བྱས་པའི་ལས་དོན་རུ་ཁག་གིས།དམངས་འཚོའི་དམངས་སེམས་ལ་དམིགས་ཏེ་གྲོང་གསེབ་ དར་རྒྱས་གཏོང་རྒྱུར་སྐུལ་འདེད་བཏང་བ།

གསར་འགྱུར་སྤེལ་དུས། 　【2022-01-11 15:38:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཆབ་མདོ་གྲོང་ཁྱེར་ལྷོ་རོང་རྫོང་ཤིང་རོང་ཤང་བམ་སྟེང་གྲོང་ཚོའི་ཁག་བཅུ་པའི་ལས་དོན་རུ་ཁག་བཅའ་སྡོད་བྱས་པ་ནས་བཟུང་ཏང་འཛུགས་སྐྱོང་གིས་སྤྱི་འདོམས་བྱ་རྒྱུ་ཐོག་མཐའ་བར་གསུམ་དུ་མཐའ་འཁྱོངས་བྱས་ནས། དམངས་འཚོའི་དམངས་སེམས་ལ་དམིགས་པ། དངོས་སྒྲུབ་འགན་འཁུར་ལ་བརྟེན་ནས་གྲོང་གསེབ་དར་རྒྱས་གཏོང་བའི་ལེའུ་གསར་པ་བརྩམས་ཡོད།

བརྟག་དཔྱད་མཐིལ་རྟོགས་གཏིང་ཟབ་བྱེད་པ། གྲོང་ཚོར་བཅའ་སྡོད་ལས་དོན་རུ་ཁག་དེས་བཅར་འདྲི་དང་བརྟག་དཔྱད་ཞིབ་འཇུག་བྱ་རྒྱུ་དེ་འགག་རྩའི་ཞིག་ཏུ་བརྩིས་ནས། མང་ཚོགས་ཀྱི་ཁྱིམ་དང་ཞིང་ཁ་དང་མུ་ཁར་ཕྱིན་ནས་བརྟག་དཔྱད་ཞིབ་འཇུག་བྱས་ཤིང་། “ཉན་པ་དང་ལྟ་བ། བརྟག་པ། འདྲི་བ། འགྲོ་བ་”སོགས་ཀྱི་བྱེད་ཐབས་སྤྱད་དེ། གྲོང་ཚོ་ཡོངས་ཀྱི་མི་གྲངས་དང་། དུད་ཚང་། ཕྱུགས་གྲངས། རྨོ་ཞིང་གི་རྒྱ་ཁྱོན། གཙོ་གནད་མི་སྣ། དཀའ་ངལ་ཡོད་པའི་མི་ཚོགས་སོགས་ཀྱི་གནས་ཚུལ་ཁྱོན་ཡོངས་ནས་ཤེས་རྟོགས་དང་། རིགས་ཁག་གི་ཆ་འཕྲིན་རྩིས་ཁྲ་རིགས་དབྱེ་གསར་སྒྱུར་དང་འཐུས་སྒོ་ཚང་དུ་གཏོང་བ། གྲོང་ཚོ་ཡོངས་ཀྱི་གཞི་རྩའི་གནས་ཚུལ་གནད་སྨིན་ཁོང་དུ་ཆུད་པ། ཞིང་འབྲོག་མང་ཚོགས་ཀྱི་བསམ་འཆར་དང་གྲོས་འགོ་ནན་ཏན་ངང་ཉན་པ་བཅས་བྱས་ཏེ་གྲོང་ཚོར་བཅའ་སྡོད་བྱས་ཚུན་སྔ་རྗེས་སུ་མང་ཚོགས་མི་ཐེངས་1200ལྷག་ཙམ་ལ་བཅར་འདྲི་བྱས་པ་དང་། གྲོང་ཚོར་བཅའ་སྡོད་ཉིན་ཐོ་60ལྷག་ཙམ་དང་དམངས་ཀྱི་ཉིན་ཐོ་60ལྷག་ཙམ་བྲིས་ཡོད།

“དྲོ་སྐྱིད་”སྦྱིན་པའི་ཞབས་ཞུ་སྤེལ་བ། གྲོང་ཚོར་བཅའ་སྡོད་ལས་དོན་རུ་ཁག་དེས“ཏང་འཛུགས་སྐྱོང་+དང་བླངས་ཞབས་ཞུའི”ལས་ཀའི་རྣམ་པ་ཧུར་ཐག་བཙུགས་ཤིང་། ཀྲི་པུའུ་ཡིས་ཏང་ཡོན་ལ་སྣེ་ཁྲིད་དང་ཏང་ཡོན་གྱིས་མང་ཚོགས་ལ་སྣེ་ཁྲིད་བྱེད་པའི་རྣམ་པ་ཐོག་ནས། ཏང་ཡོན་གྱིས་མང་ཚོགས་ལ་འབྲེལ་གཏུག་དང་ཞབས་འདེགས་ཞུ་བའི་ལས་ཀ་སྤེལ་ཏེ། ཏང་ཡོན་75སྒྲིག་འཛུགས་བྱས་ནས། དུད་ཚང་འགན་གཙང་གི་བྱ་ཐབས་ཐོག་ནས་ཞིང་འབྲོག་མང་ཚོགས་དུད་ཚང་112ལ་འབྲེལ་གཏུག་དང་ཞབས་ཞུ་བྱས་པ་མ་ཟད། ཏང་ཡོན་གྱི་གདོང་ལེན་དཔེ་བཟང་གི་སྣེ་ཁྲིད་ནུས་པ་འདོན་སྤེལ་གང་ལེགས་བྱས་ཏེ་ཏང་ཡོན་གྱི་གདོང་ལེན་ཞབས་ཞུ་རུ་ཁག་3བཙུགས་ནས་དཀའ་ངལ་ཡོད་པའི་མང་ཚོགས་ལ་ནས་བསྡུ་རོགས་དང་ཁོར་ཡུག་འཕྲོད་བསྟེན་བཅོས་སྒྲིག་སོགས་ཀྱི་བྱེད་སྒོ་ཁག་30ལྷག་ཙམ་སྤེལ་ནས་མང་ཚོགས་ཀྱི་དཀའ་ངལ་དངོས་12ཐག་གཅོད་བྱེད་རོགས་བྱས་པ་དང་ཏང་དང་མང་ཚོགས་དབར་གྱི་འབྲེལ་བར་སྔར་བས་ཤུགས་སྣོན་བརྒྱབ་སྟེ་མང་ཚོགས་ལ་ཞབས་འདེགས་ཞུ་བའི“བར་ཐག་མེད་པ”བྱས་པ་རེད།

བསམ་བློའི་སློབ་གསོ་ཡིས་དམངས་སེམས་གཅིག་ཏུ་སྒྲིལ་བ། གྲོང་ཚོར་བཅའ་སྡོད་ལས་དོན་རུ་ཁག་གིས“ཚོགས་འདུ་གསུམ་དང་སློབ་ཚན་གཅིག”དང་།“བརྗོད་དོན་གཙོ་བོའི་ཏང་གི་ཉིན་མོ”ཏང་ཡོན་ལ་དམངས་གཙོའི་དཔྱད་མོལ་བྱེད་པ་སོགས་ཏང་ནང་ཁུལ་གྱི་ཆབ་སྲིད་འཚོ་བའི་ལམ་ལུགས་གང་ལེགས་སྤྱད་དེ“སྣང་ཆེན་བཞི་དང་དགའ་ཞེན་བཞིའི”མང་ཚོགས་ཀྱི་སློབ་གསོ་ལག་ལེན་བྱེད་སྒོ་དང་ཏང་གི་ལོ་རྒྱུས་སློབ་སྦྱོང་སློབ་གསོའི་བྱེད་སྒོ་གཏིང་ཟབ་སྤེལ་ནས་རྒྱ་ཆེའི་ཞིང་འབྲོག་ཏང་ཡོན་གྱིས་ཏང་གི་རྗེས་སུ་འབྲང་བའི་ཆོད་སེམས་སྔར་བས་བརྟན་དུ་བཏང་སྟེ་ཏང་གི་སྲིད་འཛིན་རྨང་གཞི་བརྟན་དུ་བཏང་ཡོད། དེ་དང་ཆབས་ཅིག་གྲོང་ཚོ་རིམ་པའི་ཏང་ཀྲི་པུའུ་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་གཅིག་སྡུད་ཐོག་སློབ་ཁྲིད་བྱེད་པ་དང་། ཁྱིམ་དུ་སློབ་ཁྲིད་བྱེད་པ། རྒྱ་ཁྱབ་བརྡ་སྦྱོར་སྦྱར་བ། གྱོད་དཔེའི་སློབ་ཁྲིད་བྱེད་པ་སོགས་ཀྱི་བྱེད་ཐབས་སྤྱད་དེ་ཏང་གི་བྱེད་ཕྱོགས་སྲིད་ཇུས་དང་དམངས་ཕན་སྲིད་ཇུས་རྒྱ་ཁྱབ་ངང་དྲིལ་བསྒྲགས་དང་འགྲེལ་བཤད་གཏིང་ཟབ་བྱས་ནས་ཞིང་འབྲོག་མང་ཚོགས་ཀྱི་ཤེས་རྟོགས་ཐུབ་ཚད་སྔར་བས་མཐོ་རུ་བཏང་ཡོད། མིག་སྔའི་བར་ཏང་ཀྲི་པུའུ་ཡིས་གཅིག་སྡུད་སློབ་སྦྱོང་ཚོགས་འདུ་ཐེངས་20ལྷག་ཙམ་སྒྲིག་འཛུགས་བྱས་ནས་ཏང་གི་སློབ་ཚན་ཐེངས་7ལྷག་ཙམ་འཚོགས་པ་དང་། “བརྗོད་དོན་གཙོ་བོའི་ཏང་གི་ཉིན་མོའི”བྱེད་སྒོ་ཐེངས་11སྤེལ་བ། སྲིད་ཇུས་དྲིལ་བསྒྲགས་སྣ་ཚོགས་ཐེངས་90སྤེལ་བ། སྒོ་རྩར་སློབ་གསོ་ཐེངས་3སྤེལ་བ། དྲིལ་བསྒྲགས་དཔྱད་ཡིག་270སྤྲད་པ། དྲིལ་བསྒྲགས་སྦྱར་ཡིག་60སྦྱར་བ་བཅས་བྱས་ཡོད།