གྲོང་ཁྱེར་མཐོ་རིམ་སློབ་འབྲིང་གཉིས་པའི་མཐོ་གསུམ་འཛིན་གྲྭ་བཅུ་གཉིས་པའི་སློབ་མ་བཀྲ་ཤིས་ཆོས་བཟང་།དུས་རབས་ཉེར་གཅིག་པའི་དགེ་རྒན་འགའ་གླེང་བ།

གསར་འགྱུར་སྤེལ་དུས། 　【2022-04-15 09:00:00】

དགེ་རྒན་མེད་པའི་གོང་རོལ་ན། མཁས་པ་ཞེས་པའི་མིང་ཡང་མེད།ཞེས་གསུངས་པ་ལྟར། དགེ་རྒན་ནི་ལེགས་ཉེས་ཀྱི་ལམ་བུར་ཁྲིད་མཁན་ཐོག་མར་གྱུར་ཡོད་ལ། སློབ་མའི་མི་གཞི་བསྐྲུན་མཁན་གྱི་སྣེ་ཤན་དེའང་དགེ་རྒན་ལས་གཞན་སུ་གང་མེད། དགེ་རྒན་ཞེས་པའི་ལས་གནས་ནི་ལས་གནས་ཀུན་ལས་མཆོག་ཡིན་ལ། ཆེས་དཀའ་ཤོས་དང་བྲེལ་ཤོས་དེའང་དགེ་རྒན་གྱི་ལས་གནས་འདི་ཡིན།

༡ རིག་གནས་ངེས་ཅན་ཞིག་དང་སློབ་མར་ཕན་སེམས་བཅངས་རྒྱུ་ནི་དགེ་རྒན་ཞིག་ལ་ཚང་དགོས་པའི་ཆ་རྐྱེན་ཨང་དང་པོ་དེ་རེད།

བྱིས་པ་ལ་ཀ་བ་དང་བུམ་པ་ཞེས་པའི་ཚིག་སྐམ་པོ་བསླབ་པ་ཙམ་ལས་དངོས་སུ་ཀ་བ་དང་བུམ་པ་ཞེས་པ་དེ་ཇི་འདྲ་ཡིན་མིན་དོན་བྱེད་ནུས་པ་གང་ཐོན་མིན་གསལ་པོར་བརྗོད་མ་ཤེས་ཚེ། བྱིས་པ་དེས་དངོས་སུ་ཀ་བུམ་གཉིས་མཐོང་ཚེ་ཀ་བ་ལ་བུམ་པ་དང་བུ་པ་ལ་ཀ་བ་ཞེས་བརྗོད་ན་ཡང་སྲིད། དེ་ནི་བྱིས་པའི་ནོར་འཁྲུལ་མ་ཡིན། གལ་སྲིད་བྱིས་པ་དེ་ལ་ཐ་སྙད་སྐམ་པོ་ཙམ་ཞིག་དགེ་རྒན་རང་གིས་ཤེས་ལ་མ་ཤེས་ཀྱིས་མ་བསླབ་ཚེ་ཁོས་དེ་གཉིས་ནོར་མི་སྲིད་ལ། ད་རུང་སེམས་ཐག་ཆོད་པོས་འདི་རེད་དེ་རེད་ཅེས་ག་ལ་ཟེར། ཁོས་ཐ་སྙད་དེ་ཐོས་མ་མྱོང་མཐོང་མ་མྱོང་བས་གཞན་དག་ལ་དྲི་ངེས། ཤེས་ལ་མ་ཤེས་ཀྱིས་སློབ་ཁྲིད་བྱེད་པ་དེས་སློབ་མ་ལ་གནོད་པ་ལས་ཕན་པ་གང་ཡང་མེད། ཤེས་རིག་ཉི་མ་འདྲ་བ་ཞིག་ཡོད་ཀྱང་། ཕན་སེམས་ལྷག་བསམ་ཟླ་བ་ལྟར་མེད་ན། སློབ་མའི་རྨོངས་པ་སེལ་མི་ཐུབ། “སློབ་གསོའི་ཁྲོད་ཀྱི་བརྩེ་བ་ནི་མཁའ་དབུགས་དང་ཉི་འོད། ཞིང་ས་དང་ཆུ་མིག། མར་རྩམ་དང་སློག་པ་སོགས་རེད། དགེ་རྒན་གྱི་བརྩེ་བ་ནི་མིའི་རིགས་ཀྱི་འཚོ་གནས་དང་འཕེལ་རྒྱས་ལ་མཁོ་བའི་དངོས་པོ་གང་གི་དཔེ་རུ་བཞག་ཀྱང་ཐལ་དྲགས་མེད། དེར་བརྟེན་རྒན་རབས་སློབ་གསོ་བ་ཤ་ཀའེ་ཙུན་གྱིས་སློབ་གསོ་ལ་བརྩེ་སེམས་མེད་པ་ནི་ཆུ་མེད་པའི་རྫིང་བུ་དང་འདྲ། དེ་ཡང་ཆུ་མེད་པའི་རྫིང་བུར་རྫིང་བུའི་མཚན་ཉིད་མི་ཚང་བ་ལྟར། བརྩེ་སེམས་མེད་པའི་སློབ་གསོར་སློབ་གསོའི་མཚན་ཉིད་མི་ཚང་བ་རེད་ཅེས་གསུངས། ”① ཀྲུའུ་ཡུང་ཤིན་གྱི་《རེ་འདུན་དང་ཆེས་མཚམས་པའི་སློབ་གསོར་འཇུག་པ》ཤོག་གྲངས༢༢༨ དངོས་གྲུབ་ཚེ་བརྟན་གྱིས་བོད་ཡིག་ཏུ་བསྒྱུར། ཨ་མ་རྒྱལ་གངས་འཕྲིན་སྟེགས་ལས་དྲངས།

དུག་ཅན་གྱི་མེ་ཏོག་དྲི་ཞིམ་ཡང་ཡིད་དགའ་དེ་ལ་འཁོར་མི་འགྱུར། ལྷག་བསམ་དང་ཁ་གྱེས་ཚར་བའི་དགེ་རྒན་དེ། སློབ་མ་དང་སྤྱི་ཚོགས་ལ་དགོས་མཁོ་ཅི།

༢ སློབ་མ་ཡི་ཆེད་དུ་སློབ་ཁྲིད་བྱེད་པ་དང་མཚན་སྙན་གྱི་ཆེད་དུ་སློབ་ཁྲིད་བྱེད་པ་གཉིས་གཏན་ནས་མི་འདྲ། སློབ་མའི་མི་ཚེ་ནི་བྲིས་མ་ཚར་བའི་ཤོག་དཀར་ཞིག་དང་སློབ་མ་རང་ཉིད་ནི་སྤྱོད་མ་མྱོང་བའི་སྨྱུ་གུ་ཞིག་ལ་བསམས་ན། དགེ་རྒན་ནི་ཤོག་སྟེང་ལ་འབྲི་མཁན་གྱི་བྱེད་པོ་དེའོ། སློབ་མའི་མི་ཚེ་འོད་ཟེར་ལྡན་མིན་ནི་དགེ་རྒན་དེ་ལ་སློབ་གསོའི་འོད་མདངས་ཡོད་མེད་ཡིན། དེང་དུས་ཀྱི་དགེ་རྒན་ཕལ་མོ་ཆེས་སློབ་མ་དེའི་ཡིག་རྒྱུགས་ཀྱི་སྐར་གྲངས་ལ་བསམ་བློ་གཏོང་བ་ལས་སློབ་མས་ཚིག་དོན་གཉིས་ཀར་ཡང་དག་པར་རྟོགས་མིན་མི་བལྟ་ལ། ཐ་ན། སློབ་མ་སོ་སོའི་ལྟ་བ་བཤད་སའི་གོ་སྐབས་ཀྱང་མེད། སློབ་མའི་དོགས་དྲི་ལ་སྐྲག་སོང་བ་རེད་དམ། ཡང་ན། རང་ཉིད་ཀྱི་སློབ་ཁྲིད་ཐབས་ཤེས་མཆོག་ཏུ་གྱུར་བས་རེད། དྲག་སྤྱོད་ཀྱིས་སློབ་མར་ཚིག་སྐམ་པོ་བློ་རུ་འཛིན་དུ་བཅུག་པ་དེ་སློབ་མའི་ཆེད་དུ་སློབ་ཁྲིད་བྱེད་པ་རེད་དམ། ཡང་ན། སྙན་གྲགས་དང་སྐར་གྲངས་ཀྱི་ཆེད་དུ་སློབ་ཁྲིད་བྱེད་པ་རེད། ཉེར་གཅིག་གི་དགེ་རྒན་རྣམས་དྲི་བ་དེ་ལ་ལན་གཅིག་ཡོད་པ་ཞུ། སློབ་མ་མང་པོ་དགེ་རྒན་གྱི་དྲག་སྤྱོད་ལ་སྐྲག་ནས་ཚིག་སྐམ་པོ་དེ་རབ་རིབ་ཞིག་བློར་འཛིན་ཐུབ་ལ། ཡིག་རྒྱུགས་ནང་ལའང་སྐབས་རེ་འབྲི་ཐུབ་ལ་སྐབས་རེ་འབྲིའང་མི་ཐུབ་སྟེ། ནང་དོན་ལ་འགྱུར་བ་མ་གཏང་བར་མིང་ཚིག་ཐ་སྙད་འགའ་བརྗེས་ནས་དྲི་བ་གཏོན་དུས་ཁོས་སྔར་ལྟར་འབྲི་མི་ཐུབ། དེ་བས། ཚིག་འབྲུ་སྐམ་པོ་འགས་སློབ་མ་ལ་འོད་ཟེར་སྟོང་ལྡན་གྱི་ལམ་ཆེན་ཞིག་སྟེར་ཐུབ་བམ། དེའང་མགོ་ན་དགོས་པའི་དྲི་བ་ཞིག་རེད།

（མཛུབ་སྟོན་དགེ་རྒན། ཚེ་རིང་བཀྲ་ཤིས）