ཡིད་དུ་འོང་བའི་ཕ་ཡུལ།སྐལ་བཟང་བདེ་སྐྱིད།（གྲོང་ཁྱེར་མཐོ་འབྲིང་བཞི་པའི2021ལོའི་འཛིན་གྲྭ་དགུ་པའི་སློབ་མ།）

གསར་འགྱུར་སྤེལ་དུས། 　【2022-04-29 09:00:00】

བདག་གི་ཕ་ཡུལ་ནི་འཇིག་རྟེན་མི་ཡུལ་གྱི་ཡང་རྩེར་གནས་པའི་བོད་ཁ་བ་ཅན་གྱི་ཞིང་ཁམས་ཞེས་སྙན་པའི་གྲགས་པ་ཕྱོགས་བཅུར་ཁྱབ་པའི་ས་ཡི་ཐིག་ལེ། བོད་ཁམས་སྟོད་སྨད་བར་གསུམ་དུ་ཕྱེ་བའི་སྨད་མདོ་ཁམས་ཡུལ་གྱི་སྙིང་པོ། མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་སྐྱིད་ལ་མཛེས་སྡུག་ལྡན་པའི་དབྱི་ཤོད་རི་བོ་ཆེ་ཡིན།

དགུང་སྔོན་དབྱིངས་ནས་རྟ་བདུན་དབང་པོས་འཛུམ་མདངས་ག་ལེར་ངོམས་བཞིན་ཆུ་འཛིན་བུ་མོའི་ལན་བུའི་བར་ནས་དལ་གྱིས་ནོར་འཛིན་བདག་མོའི་ལུས་སྟེང་དུ་འོད་ཀྱིས་འཚེར། འདི་ནི་སྟག་ལུང་བཀའ་བརྒྱུད་ཀྱི་མ་དགོན་ཁྲ་འཁྱིལ་མའི་སྙན་གྲགས་ཀྱི་ཟེར་འོད་རི་བོ་ཆེའི་ལ་དང་ལུང་པ། ཐང་དང་གྲོང་བརྡལ་ཀུན་ཏུ་ཁྱབ་པ་དང་གཉིས་སུ་མེད།

ཁྲ་འཁྱིལ་མའི་གཙུག་ལག་ཁང་ནི་རི་བོ་ཆེའི་རྫོང་མཁར་གྲོང་གི་བྱང་ཕྱོགས་ཀྱི་སྤྱི་ལི་25་ཡི་མཚམས་སུ་གནས་ཡོད་ཅིང་། རྒྱ་མཚོའི་ངོས་ལས་མཐོ་ཚད་སྨི4200ལྷག་ཡོད། དགོན་པ་འདི་ནི་རི་བོ་ཆེ་དགོན་པའི་ཁྲི་རབས་དང་པོ་རྗེ་བཙུན་སངས་རྒྱས་དབོན་གྱིས་སྤྱི་ལོ1276ལོར་ཕྱག་བཏབ་ཅིང་། བཀོད་པ་ལྷའི་གཞལ་ཡས་ཁང་གི་རྩལ་དང་འགྲན་ཞིང་། དབྱིབས་གྲུ་བཞིའི་ཐོག ཁྲ་འཁྱིལ་མ་དང་དམར་འཁྱིལ་མ། དཀར་འཁྱིལ་མ་བཅས་རིམ་པ་གསུམ་གྱིས་གྲུབ་ཡོད། གཙུག་ལག་ཁང་འདིའི་འཛུགས་སྐྲུན་གྱི་རྒྱ་ཁྱོན་ལ་སྨི་ངོས་སྙོམས་གྲུ་བཞི་མ3334.64ཡོད་ཅིང་། ཐོག་བརྩེགས་དང་པོ་ཁོ་ནར་ཀ་བ180ཡོད། སྤྱིའི་བཟོ་སྐྲུན་ལ་བོད་རྒྱ་བལ་དང་ཧིན་ཏུ་བཅས་ཀྱི་བཟོ་རྩལ་ཁྱད་ཆོས་ཕྱོགས་བཞིའི་ཆུ་ཕྲན་རྒྱ་མཚོའི་པང་དུ་འདུས་པ་ལྟར་དུ་སྣང་།

གཙུག་ལག་ཁང་འདི་ཉིད་སྤྱི་ལོ1996ལོའི་ཟླ་བཞི་པར་ལྗོངས་རིམ་པའི་རིག་དངོས་སྲུང་སྐྱོབ་སྡེ་ཚན་དུ་ཚུད་པ་དང་། 2006ལོར་རྒྱལ་ཡོངས་ཀྱི་རིག་དངོས་སྲུང་སྐྱོབ་སྡེ་ཚན་གཙོ་གནས་ལ་བཞག་པ་མ་ཟད། མི་རིགས་མང་པོའི་མི་དམངས་ཁྲ་འཁྱིལ་མའི་མཛེས་པའི་བཀོད་པ། སྙན་པའི་གྲགས་པ་སོགས་ཀྱིས་བུང་བ་པད་མར་འཁོར་བ་བཞིན་ཕྱོགས་བཞི་མཚམས་བརྒྱད་ནས་མིག་གི་བཅུད་དང་ཡིད་ཀྱི་རྟེན་དུ་གྱུར་ཆེད་མ་འབོད་རང་འདུས་ཀྱིས་འདིའི་ཕྱོགས་སུ་འཁོར་གྱིན་ཡོད།

རྫོང་གི་ནུབ་ཕྱོགས་སྤྱི་ལི་45ཡི་མཚམས་སུ་གཡས་རུ་ཆུ་ཚན་གནས་ཡོད་ལ། ཆུ་ཚན་འདི་ནི་རང་གར་བཞུར་བའི་ཆུ་བོ་དཀྱུས་མ་ཞིག་རྩ་ནས་མ་ལགས་ཏེ། ལུས་ཀྱི་ནད་དང་མཛེར་པ། ལྷག་པར་དུ་ཕོ་བའི་ནད་ལ་ཤིན་ཏུ་ཕན་པར་གྲགས་པས། གནས་དེར་ཡོང་བའི་ཕྱོགས་ཀྱི་མགྲོན་པོ་ནི་རགས་ལས་ཤོར་བའི་ཆུ་བཞིན་ཆད་པ་མེད། དེ་ནས་མར་ཡུན་ཙམ་སོང་རྗེས། གཡས་རུ་གྲོག་རོང་ཆེན་མོར་སླེབས་སྲིད་ཅིང་། གླིང་གེ་སར་རྒྱལ་པོའི་ལོ་རྒྱུས་དང་འབྲེལ་བའི་གྲོག་རོང་དེའི་བཤད་སྲོལ་སྣ་ཚོགས་ཡུལ་དེའི་རྒན་པོ་དག་གི་ངག་ན་ད་དུང་གསལ་ལེར་ཡིན། འདོ་བ་རྟ་ཡི་བང་ཁ་རླུང་ལ་འགྲན་ཞིང་། ཨ་ཟས་འབྲི་མོའི་ངུར་སྒྲ་འབྲུག་ལྟར་གྲགས་པའི་གཡས་རུ་རྩྭ་ཐང་ཡང་གྲོག་རོང་ཆེན་མོ་འདིར་གནས་ཡོད།

དཔྱིད་ཀྱི་ཕོ་ཉ་མདོ་དབུས་མཐོ་སྒང་དུ་སླེབས་དུས། ཕ་ཡུལ་གྱི་རི་བོ་དག་གཡུ་འབྲུག་ཐང་དུ་ཉལ་བ་ཇི་བཞིན་འགྱིང་བག་ལྡན་ལ། རི་སྐེད་དུ་ན་བུན་ལང་ལོང་འཁྱིལ་བ་དག་སྐབས་སྐབས་སུ་དར་དཀར་ཡུག་གཅིག་རི་བོའི་མགུལ་ལ་བསྒྲོན་པ་དང་ཡོངས་སུ་མཚུངས་ཤིང་། མཚམས་མཚམས་སུ་ལྷ་བསང་གི་དུ་བ་དཀར་པོ་རྣམ་སད་ཚོགས་ལ་མཆོད་པ་བཞིན་དལ་གྱིས་འཕྱོ། ཡུལ་དེའི་རི་ལུང་ཐང་གསུམ་ལ་སྐྱེས་སྟོབས་ཀྱི་དཔལ་མེ་ལྕི་བཞིན་འུར་འུར་དུ་འབར་ཞིང་གསོན་ཤུགས་དབྱར་གྱི་མཚོ་མོ་བཞིན་རྒྱས། ཡིད་འོང་ནེའུ་གསིང་གཞུང་དུ་འབབ་པའི་ཡན་ལག་བརྒྱད་ལྡན་གྱི་དལ་འགྲོ་རྣམས་སྐྱེ་འགྲོ་ཀུན་གྱི་སྐོམ་པའི་གདུང་བ་སེལ་ཕྱིར་བྲལ་བས་རྒྱུག

དབྱར་གྱི་དུས་སུ་རི་ལུང་ཀུན་ཏུ་མེ་ཏོག་འདྲ་མིན་སྣ་ཚོགས་གཅིག་རྗེས་གཅིག་གིས་མནན་ཏེ་བཞད་ལ། སྤུ་མདོག་རྣམ་པར་བཀྲ་བའི་བྱ་དང་བྱིའུ་རྣམས་ཀྱིས་ཕ་ཡུལ་གྱི་མཛེས་ལྗོངས་ལ་བསྟོད་པའི་གླུ་དབྱངས་ལེན་ཞིང་གར་གྱི་སྟོན་མོ་བཤམས། རྟ་ནོར་ལུག་གསུམ་ཤ་ཤེད་རྒྱས་ཤིང་རྩྭ་བཅུད་ཕུན་སུམ་ཚོགས་པར་ཅི་དགར་ལོངས་སུ་སྤྱོད། ཞིང་ཁའི་མྱུ་གུ་ལྷ་ཡུལ་གྱི་སྐྱེད་ཚལ་ཇི་བཞིན་མཛེས་ཤིང་ལྟ་ན་སྡུག་པས་ལོ་ལེགས་ཀྱི་སྔ་ལྟས་བཟང་པོ་རི་མོར་མངོན།

སྟོན་གྱི་དུས་སུ་ནོར་འཛིན་སྒེག་མོས་རིན་ཆེན་གསེར་མདོག་གི་ལྭ་བ་གྱོན་ཞིང་། སྟོན་རླུང་བསིལ་མས་དལ་གྱིས་གཡོ་བའི་ཞིང་ཐང་གི་སྙེ་མའི་རླབས་ནི་རྨ་འབྲི་རྫ་གསུམ་གྱི་རྦ་རླབས་མཁའ་རུ་འཕྱོ་བ་དང་གཉིས་སུ་མེད། ཕུན་ཚོགས་འབྲས་བཟང་ཅི་དགར་རོལ་བའི་དུས་བཟང་འདིར། ཞིང་པ་རྣམས་སྟོན་ལས་ལ་བྲེལ་ཞིང་ཞལ་གྱི་བང་མཛོད་དགའ་བའི་འབྲུ་ཡིས་ཁེངས།

དགུན་གྱི་དུས་སུ་དཀར་འཇམ་གྱི་ཁ་བའི་འདབ་མ་ལྷབ་ལྷབ་ཏུ་བབས་པས་ནོར་འཛིན་སྒེག་མོ་དར་དཀར་གྱི་ཡོལ་བས་རབ་ཏུ་བསྒྲིབས། རི་ལུང་ཁང་ཁྱིམ་མ་ལུས་དཀར་མོ་དངུལ་གྱི་ཁུ་བ་བྱུགས་པ་ཇི་བཞིན་མཛེས་ཤིང་ཡིད་དུ་འོང་། ལྷུང་ལྷུང་བཞུར་བའི་ཆུ་བོ་དང་ཤང་ཤང་འབབ་པའི་ཆུ་ཕྲན་རྣམས་དངུལ་དཀར་གྱི་སྒྲོམ་དུ་བག་ཕེབས་ངང་རྨི་ལམ་གྱི་གྲོང་སྒོ་ཉུལ།

ས་སྐྱིད་པོ་སྟེང་མ་ལྷ་ལ་འགྲན།།

ཡུལ་བཟང་པོ་འཛམ་གླིང་ཡོངས་ཀྱི་རྒྱན།།

རྒྱུད་རང་གཤིས་ཚིགས་དྲུག་མདའ་ལས་དྲང་།།

རྒན་ལོ་ལོན་ལྷག་བསམ་དར་ལས་དཀར།།

གཞོན་བྱིས་པའི་རིག་པ་འོད་ལས་གསལ།།

གནས་འདི་ནི་བདག་གི་ཕ་ཡུལ་ཏེ།།

སྨད་མདོ་ཁམས་དབྱི་ཤོད་འཆི་མེད་གྲོང་།།

མཛུབ་སྟོན་དགེ་རྒན། རིན་ཆེན་དབང་འདུས།