ཆབ་མདོ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས།ལས་རྨས་འགན་བཅོལ་གྱི་ཐོབ་ཐང་རྩོད་གཞི་ཞིག་འདུམ་འགྲིག་ནུས་ལྡན་བྱས་པ།

གསར་འགྱུར་སྤེལ་དུས། 　【2022-05-10 09:00:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར། ཆབ་མདོ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཆུ་ཚོད་བཞི་སྤྱད་དེ་ལོ་གཉིས་ལྷག་ཙམ་སོང་བའི་དཀའ་གནད་དང་རྙོག་འཛིང་ཆེ་བའི་ལས་རྨས་འགན་བཅོལ་གྱི་ཐོབ་ཐང་རྩོད་གཞིའི་གྱོད་གཞི་ཞིག་ཐག་གཅོད་འདུམ་འགྲིག་ནུས་ལྡན་བྱས་པར་དོ་བདག་གི་གདེང་འཇོག་བཟང་པོ་ཐོབ་པ་རེད།

ཤེས་རྟོགས་བྱུང་བར་གཞིགས་ན། 2020ལོའི་ཟླ་7ཚེས་19ཉིན། ཕན་ཆེ་གེ་མོས་འཇོ་མདའ་རྫོང་གི་རླངས་འཁོར་ཉམས་གསོ་ཁང་ཞིག་གི་རེ་བ་ལྟར་འཇོ་མདའ་རྫོང་མཁར་སྒང་ཤང་དུ་རླངས་འཁོར་ཞིབ་བཤེར་ཉམས་གསོ་བྱེད་པར་བསྐྱོད། ཕྱིར་ལོག་པའི་ལམ་བར་དུ་གློ་བུར་དུ་འགྲིམ་འགྲུལ་ལས་འཛོལ་ཐོན་ནས་རླངས་འཁོར་གཡང་ལ་ཟགས་ཏེ་ཕན་ཆེ་གེ་མོར་རྨས་སྐྱོན་ཆེན་པོ་ཕོག་ཡོད། ལས་འཛོལ་ཐོན་རྗེས་ཆབ་མདོ་གྲོང་ཁྱེར་མི་སྤྱི་ཅུས་ཀྱིས་ལས་རྨས་ངོས་འཛིན་གཏན་འཁེལ་གྱི་གཏན་འབེབས་བྱས་ནས་ཕན་ཆེ་གེ་མོ་ལས་རྨས་སུ་གཏན་འཁེལ་བྱས་པ་དང་། ཆབ་མདོ་གྲོང་ཁྱེར་ངལ་རྩོལ་ནུས་པ་གསལ་འབྱེད་ཨུ་ཡོན་ལྷན་ཁང་གིས་རྨས་སྐྱོན་རིམ་པ་དགུར་གཏན་འཁེལ་བྱས་པ་རེད། ཕན་ཆེ་གེ་མོ་སྨན་ཁང་ནས་དོན་རྗེས་རང་ཉིད་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱ་ཆེད། འཇོ་མདའ་རྫོང་མི་དོན་རྩོད་གཞི་འདུམ་གཅོད་ཨུ་ཡོན་ལྷན་ཁང་ལ་འདུམ་གཅོད་བྱ་རྒྱུའི་ཁྲུན་ཐག་གཅོད་རེ་ཞུས་པ་དང་། འཇོ་མདའ་རྫོང་མི་དོན་རྩོད་གཞི་འདུམ་གཅོད་ཨུ་ཡོན་ལྷན་ཁང་གིས་མཐར་མི་སྤྱོད་ཚན་པ་འཇོ་མདའ་རྫོང་གི་རླངས་འཁོར་ཉམས་གསོ་ཁང་དེས་ཕན་ཆེ་གེ་མོར་ཁྱོན་འགྲོ་གྲོན་སྒོར་ཁྲི་31ལྷག་ཙམ་སྐྱིན་ཚབ་འཇལ་དགོས་པའི་ཁྲུན་ཐག་བཅད་པ་རེད། འཇོ་མདའ་རྫོང་གི་རླངས་འཁོར་ཉམས་གསོ་ཁང་དེས་ཁྲིམས་ཐག་དེ་དང་ལེན་མ་བྱས་པར། འཇོ་མདའ་རྫོང་མི་དམངས་ཁྲིམས་ཁང་ལ་གཏུག་བཤེར་བྱས་པ་དང་། འདྲི་གཅོད་དང་པོའི་ཁྲིམས་ཁང་གིས་ཁྲིམས་ལྟར་རླངས་འཁོར་ཉམས་གསོ་ཁང་དེས་ཕན་ཆེ་གེ་མོར་གྲོན་དངུལ་སྣ་ཚོགས་བསྡོམས་པས་སྒོར་ཁྲི་31སྤྲོད་དགོས་པའི་ཁྲིམས་ཐག་བཅད་པ་དང་། འཇོ་མདའ་རྫོང་གི་རླངས་འཁོར་ཉམས་གསོ་ཁང་དེས་ཕན་ཆེ་གེ་མོར་འགན་བཅོལ་ཀུང་སིས་སྐྱིན་ཚབ་སྒོར་ཁྲི་16སྤྲད་ཡོད་པས་སྒོར་ཁྲི་31ནས་འཕྲི་འཐེན་བྱེད་དགོས་པའི་ངོས་འཛིན་བྱས་པར་བརྟེན། འདྲི་གཅོད་དང་པོའི་ཁྲིམས་ཐག་དང་ལེན་མ་བྱས་པར་ཆབ་མདོ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ལ་ཞུ་གཏུག་བརྒྱབ་པ་རེད།

ཆབ་མདོ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་གྱོད་གཞི་དེ་བདག་སྤྲོད་བྱས་རྗེས། ཞུ་སྦྱོར་སྔ་མ་དང་ཞུ་སྦྱོར་ཕྱི་མ་ཕྱོགས་གཉིས་དང་འབྲེལ་གཏུག་སྤེལ་རེས་ཧུར་ཐག་བྱས་ནས། ཕྱོགས་གཉིས་པོའི་དོ་བདག་གི་བསམ་འཆར་དང་རེ་ཞུ་ཉན་འཇོག་གང་ལེགས་བྱས་རྗེས། སྒྲུབ་འགན་འཁུར་བའི་ཁྲིམས་དཔོན་གྱིས་ཕྱོགས་གཉིས་པོའི་རྩོད་གཞིར་ངང་རྒྱུད་རིང་པོས་གནས་ལུགས་གསལ་བཤད་བྱས་པ་རེད། ཆུ་ཚོད་བཞི་ཙམ་རིང་བཅའ་ཁྲིམས་ལ་འགྲེལ་བཤད་གསལ་པོ་བརྒྱབ་པ་བརྒྱུད། འཇོ་མདའ་རྫོང་གི་རླངས་འཁོར་ཉམས་གསོ་ཁང་དེས་མི་སྤྱོད་ཚན་པས་འཁུར་དགོས་པའི་བཅའ་ཁྲིམས་ཀྱི་འགན་འཁྲི་ཁས་ལེན་དང་ངོས་འཛིན་བྱས་པ་མ་ཟད། རང་འགུལ་ངང་སྒོར་ཁྲི་20སྤྲོད་ཐེངས་གཅིག་ལ་སྤྲད་དེ་ཕྱོགས་གཉིས་པོ་ལག་པ་བཏང་ནས་འདུམ་འགྲིག་བྱུང་བ་རེད།

Copyright 昌都报数字报刊|所有内容为昌都报社版权所有.未经授权不得复制转载或建立镜像|藏ICP备09000698号