གངས་ལྗོངས་ས་མཐོར་གྲོང་གསེབ་དར་རྒྱས་ཀྱི་རྣམ་པ་བཟང་།

གསར་འགྱུར་སྤེལ་དུས། 　【2022-05-13 09:00:00】

ཉེ་བའི་ལོ་ཤས་རིང་། རང་ལྗོངས་ཀྱིས“བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན”ཞེས་པ་བརྗོད་དོན་གཙོ་བོར་བྱས་པའི་གྲོང་གསེབ་དར་རྒྱས་འཐབ་ཇུས་ལག་བསྟར་བྱས་ཐོག་སྲིད་ཇུས་ཀྱིས་འདེད་སྐུལ་དང་། ཐོན་ལས་མཉམ་འགུལ། དཔེ་སྟོན་སྐུལ་ཁྲིད་བཅས་བྱ་རྒྱུ་མཐའ་འཁྱོངས་བྱས་ནས། གྲོང་གསེབ་ལ་ཁྱད་ལྡན་ཐོན་ལས་ཡོད་པ་དང་། མཉམ་སྡེབ་ལ་འབབ་འཕར་རྣམ་གྲངས་ཡོད་པ། མང་ཚོགས་ལ་ཕྱུག་འགྱུར་ཐབས་ལམ་ཡོད་པ་བཅས་ཀྱི་འགན་ལེན་བྱས་པ་དང་། རི་ཆུ་བཟང་པོའི་རང་བྱུང་ཐོན་ཁུངས་ལ་བརྟེན་ནས་ཁོར་ཡུག་སྲུང་སྐྱོང་བྱས་པ་དང་ཆབས་ཅིག་ཐོན་ལས་འཕེལ་རྒྱས་བཏང་སྟེ། སྐྱེ་ཁམས་སྡོད་མལ་འཚམས་པ་དང་ཐོན་ལས་གོང་འཕེལ་གྱི་གྲོང་གསེབ་དར་རྒྱས་ལམ་བུར་བསྐྱོད་ཡོད། ཤེས་ལྡན་མི་སྣ་གཤམ་སྐྱོད་དང་གྲོང་གསེབ་ཏུ་ཚན་རྩལ་སྤེལ་ནས“ཞིང་གསུམ”ལ་ཞབས་འདེགས་ཞུ་བར་སྐུལ་འདེད་གཏོང་བ་དང་། ཞིང་ལས་ལག་རྩལ་ཐད་ཀྱི་རིགས་གཅིག་མཁས་ཅན་སྒྲིག་འཛུགས་ཀྱིས་ཞིང་ཁ་དང་མུ་ཁར་ཞིང་ལས་ལག་རྩལ་གསོ་སྦྱོང་བྱས་ཏེ། ཞིང་འབྲོག་མང་ཚོགས་ལ་གནད་དོན་ཐག་གཅོད་དང་འདེབས་འཛུགས་རྩལ་ནུས་ཆེ་རུ་གཏོང་རོགས་བྱས་པས། རྒྱ་ཆེའི་ཞིང་འབྲོག་མང་ཚོགས་ཚོར་ཐོབ་སྣང་དང་སྐྱིད་སྣང་དེ་བས་མང་པོ་ཐོབ་ཡོད།

མཉམ་སྡེབ་དཔལ་འབྱོར་རྒྱ་སྟོབས་ཆེ་རུ་བཏང་ནས་དར་རྒྱས་ལ་གསོན་ཤུཌ་བསྣན་པ།

མི་རིང་བའི་གོང་དུ། ཆབ་མདོ་གྲོང་ཁྱེར་ཁ་རུབ་ཆུས་ཁྲེང་ཀོན་གྲོང་རྡལ་ཐང་སྐྱ་གྲོང་ཚོའི་རིག་འཛིན་ལ་ཟླ་བ་གོང་མའི་གླ་ཕོགས་འབྱོར་བའི་དངུལ་ཁངགི་འཕྲིན་ཐུང་སླེབས་པ་དང་། དངུལ་ཁང་གཱ་ཐོག་གི་ལྷག་དངུལ་སྒོར་4000མང་དུ་ཕྱིན་པ་མཐོང་བས་རིག་འཛིན་གྱི་བཞིན་ལས་དགའ་བའི་འཛུམ་མདངས་བཞད།

རིག་འཛིན་ནི་འོན་ལྐུགས་ཤིག་ཡིན་པས། དེ་སྔ་གང་སར་ལས་ཀ་འཚོལ་བར་ཕྱིན་ཡང་གཅིག་ཀྱང་རག་མེད། གྲོང་ཚོའི“ཨུ་ལྷན་གཉིས”ཀྱིས་གནས་ཚུལ་ཤེས་རྟོགས་བྱུང་རྗེས། ཆབ་མདོ་གྲོང་ཁྱེར་བྲག་སྐོར་ལ་གསོལ་ཆས་གཙང་འཁྲུད་ཚད་ཡོད་འགན་འཁྲི་ཀུང་སི་ནས་ལས་ཀ་ཞིག་བཙལ་བས་ལོ་རེར་ཡོང་འབབ་སྒོར་ཁྲི་ཁ་ཤས་ཡོད་པ་རེད།

སྔར་ནས་ད་བར་ཏུ། ཐང་སྐྱ་གྲོང་ཚོའི“ཨུ་ལྷན་གཉིས”ཚན་ཁག་གིས་སེམས་ནུས་གཅིག་སྒྲིལ་གྱིས་དམངས་ཕྱུག་གྲོང་དར་དང་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་དམིགས་ཚད་དུ་བཟུང་ཐོག་གྲོང་ཚོ་ཡོངས་ཀྱི་ཡུལ་མི་ཚོར་མཐུན་སྒྲིལ་སྣེ་ཁྲིད་བྱས་ནས་བློ་གཅིག་སེམས་གཅིག་གིས་འཕེལ་རྒྱས་དོན་གཉེར་བྱས་ཏེ་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་བཏང་བར་ཕན་འབྲས་མངོན་གསལ་དོད་པོ་ཐོན་ཡོད་པ་རེད།

མིག་སྔར། ཐང་སྐྱ་གྲོང་ཚོའི་མཉམ་སྡེབ་དཔལ་འབྱོར་རྣམ་གྲངས་གཙོ་བོའི་གྲས་སུ་ཆབ་མདོ་གྲོང་ཁྱེར་ཁ་རུབ་ཆུས་མདའ་གཡེར་སོ་ཕག་བཟོ་གྲྭ་དང་ཐང་སྐྱ་གྲོང་ཚོའི་ཟོག་འགྲེམས་མཛོད་ཁང་གཉིས་ཡོད། 2019ལོར། ཐང་སྐྱ་གྲོང་ཚོས་ཐོན་ལས་གླིང་ཆུང་ངུ་ཞིག་བསྐྲུན་པའི་ནང་ཆབ་མདོ་གྲོང་ཁྱེར་བྲག་སྐོར་ལ་གསོལ་ཆས་གཙང་འཁྲུད་ཚད་ཡོད་འགན་འཁྲི་ཀུང་སི་དང་། ཁ་རུབ་ཆུས་ཁྲེང་ཀོན་གྲོང་རྡལ་ཐང་སྐྱ་གྲོང་ཚོའི་ཚོན་དར་བཟོ་གྲྭ ཁ་རུབ་ཆུས་ཁྲེང་ཀོན་གྲོང་རྡལ་ཐང་སྐྱ་གྲོང་ཚོའི་རྩམ་པ་ལས་སྣོན་བཟོ་གྲྭ ཐང་སྐྱ་གྲོང་ཚོའི་བཟའ་བཅའ་ལས་སྣོན་བཟོ་གྲྭ་སོགས་རྣམ་གྲངས་སྔ་རྗེས་སུ་ནང་འདྲེན་བྱས་པ་རེད།

2019ལོར་གྲོང་ཚོ་ཡོངས་ཀྱི་སྡོད་ཁང་ལ་ཁྱོན་ཡོངས་ནས་སྒྱུར་བཀོད་བྱས་རྗེས། ཡུལ་མི་ཚོས་ཚོང་སྒྱུར་ཁང་པ་དང་ཁང་པ་ལྷག་མ་བོགས་མར་བཏང་བ་ལས་ཡོང་འབབ་མང་དུ་ཕྱིན་ཡོད། ད་ཆ། ལོ་རེར་གྲོང་ཚོའི་མཉམ་སྡེབ་དཔལ་འབྱོར་གྱི་བགོ་འགྲེམས་ཕུད་ད་དུང་གླ་ཕོགས་དང་བོགས་དངུལ་སོགས་ཀྱང་ཡོད་པས་ལོ་ཧྲིལ་པོར་གྲོང་ཚོའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་4ཙམ་ཟིན་གྱི་ཡོད་པ་རེད།

ཞིང་ལས་དང་ཡུལ་སྐོར་མཉམ་འདྲེས་ལ་སྐུལ་འདེད་བཏང་བས་གང་སར་མཛེས་ཉམས་དོད་པ།

ཉིན་ཤས་གོང་། ཉིང་ཁྲི་གྲོང་ཁྱེར་བྲག་ཡིབ་ཆུས་དགུན་ཚང་ཤང་མོན་གྲོང་གྲོང་ཚོ་ཨུ་ལྷན་གྱིས་མང་ཚོགས་སྒྲིག་འཛུགས་བྱས་ནས་ཤིང་སྡོང་བཙུགས་པ་རེད།

མོན་གྲོང་གྲོང་ཚོའི་བུད་མེད་ཀྲུའུ་རེན་ཚེ་རིང་སྒྲོལ་དཀར་ལ་དྲི་ཞིམ་མེ་ཏོག་བཞད་རྒྱུ་ཡོད་པའི་སྡོང་པོ་བགོ་བཤའ་རག་རྗེས་འཕྲལ་དུ་རང་ཁྱིམ་མདུན་གྱི་ས་སྟོང་དུ་བཙུགས་ནས་ཡལ་བཞུར་ཡག་པོ་བརྒྱབ། “དྲི་ཞིམ་མེ་ཏོག་བཞད་རྒྱུ་ཡོད་པའི་སྡོང་པོ་འདི་འདྲ་ཆེན་པོ་ཞིག་ཉོས་ན་སྒོར་བརྒྱ་ཕྲག་ཁ་ཤས་དགོས་ཀྱི་འདུག ཤང་སྲིད་གཞུང་གིས་ང་ཚོར་སྐྱེ་ཁམས་སྐྱེད་ཚལ་རྣམ་གྲངས་བརྩོན་ལེན་བྱས་པ་དངོས་གནས་ཡག་པོ་འདུག”

མོན་གྲོང་གྲོང་ཚོའི་སྐྱེ་ཁམས་ཁོར་ཡུག་ལེགས་སུ་གཏོང་ཆེད། དགུན་ཚང་ཤང་སྲིད་གཞུང་གིས་ཉིང་ཁྲི་གྲོང་ཁྱེར་གྱི་སྐྱེ་ཁམས་སྐྱེད་ཚལ་སྤྱི་ཕན་མ་དངུལ་སྒོར་ཁྲི་350བརྩོན་ལེན་བྱས་ཏེ། མོན་གྲོང་གྲོང་ཚོར་སྐྱེ་ཁམས་སྐྱེད་ཚལ་འཛུགས་སྐྲུན་བྱས་ཤིང་། མིག་སྔར། འགྲོ་ལམ་གྱི་གཞོགས་གཉིས་དང་། སྡོད་ཁང་གི་རྒྱབ་མདུན། ས་སྟོང་ཁག་བཅས་སུ་ཚོས་སེར་སྡོང་པོ་དང་མེ་ཏོག་དབྱིང་ཧྭ་སོགས་ཀྱི་སྡོང་ཕྲུག་རྐང་2250བཙུགས་པ་དང་། ཕྱིས་སུ་རི་ལྡེབས་སོགས་སུ་ཡང་ཁམ་སྡོང་བཙུགས་ནས་གྲོང་གསེབ་ཀྱི་སྐྱེ་ཁམས་ཡུལ་སྐོར་ལ་རམ་འདེགས་བྱེད་རྒྱུ་ཡིན་པ་རེད།

ཉེ་བའི་ལོ་ཤས་རིང་། མོན་གྲོང་གྲོང་ཚོས་མདོ་སྦུག་མཚེའུ་ཁུལ་འཛུགས་སྐྲུན་དང་ཁྱད་ལྡན་རིག་གནས་ཐོན་ཁུངས་ཀྱི་ལེགས་ཆར་བརྟེན་ནས“ཏང་འཛུགས་སྐྱོང་གིས་སྣེ་ཁྲིད་དང་། ཡུལ་སྐོར་ལ་སྐུལ་འདེད། རིག་གནས་རྒྱུན་འཛིན། དཔལ་འབྱོར་འཕེལ་རྒྱས”བཅས་ཀྱི་ལས་ཀའི་བསམ་ཕྱོགས་ལ་དམ་པོར་དམིགས་ཏེ། ཁྱད་ལྡན་རིག་གནས་ཡུལ་སྐོར་འཕེལ་རྒྱས་ཤུགས་ཆེན་བཏང་བས་2021ལོར་ཡུལ་སྐོར་བ་མི་ཐེངས་ཁྲི་2ལྷག་ཙམ་ལ་སྣེ་ལེན་ཞུས་པ་དང་། མི་50ལྷག་ཙམ་ལས་ཞུགས་ཐུབ་པ། མང་ཚོགས་ལ་འབབ་འཕར་སྒོར་ཁྲི་80ལྷག་ཙམ་བྱུང་བ་རེད།

ལག་རྩལ་བརྒྱུད་ཁྲིད་བྱས་ནས་ཇ་ཞིང་ལ་དཔྱིད་དཔལ་བཞད་པ།

ཉིན་ཤས་བསྟུད་མར་རང་ལྗོངས་ཀྱི་ཞིང་པས་སོ་ནམ་དུས་ཚིགས་དམ་འཛིན་བྱས་ཏེ་ཞིང་ཁ་དང་མུ་ཁར་བྲེལ་བཞིན་ཡོད། 《2022ལོའི་ལྗོངས་ཡོངས་ཀྱི་ཞིང་ཁུངས་ལས་བྱེད་པ་གཞི་རིམ་དུ་ཞབས་འདེགས་ཞུ་བར་སྐྱོད་པའི་ཇུས་གཞིའི》བླང་བྱ་གཞིར་བཟུང་། རང་ལྗོངས་ཀྱི་ཞིང་ལས་ཚན་རྩལ་མི་སྣ་ཞིང་ཁ་དང་མུ་ཁ་དང་། མི་སེར་གྱི་ཁྱིམ་དུ་བསྐྱོད་ནས་ཐོན་སྐྱེད་དང་གྲབས་འདེབས་ཀྱི་གནས་ཚུལ་ཤེས་རྟོགས་དང་ལྷག་པའི་གནད་དོན་ལ་དུས་ཐོག་ཏུ་མཛུབ་ཁྲིད་དང་ཡོ་བསྲང་བྱས་ཏེ། དཔྱིད་རྨོད་ཐོན་སྐྱེད་ལ་སྐུལ་འདེད་ནུས་ལྡན་བཏང་ཡོད། ཉེ་བའི་ལོ་ཤས་རིང་ཇའི་ཐོན་ལས་དེ་མེ་ཏོག་རྫོང་གི་དཔལ་འབྱོར་གྱི་ཀ་རྟེན་ཐོན་ལས་གལ་ཆེན་ཞིག་ཏུ་གྱུར་ཡོད། མིག་སྔར་མེ་ཏོག་རྫོང་དུ་རི་མཐོའི་སྐྱེ་ལྡན་ཇ་ཞིང་103བསྐྲུན་པ་དེའི་སྤྱིའི་རྒྱ་ཁྱོན་ལ་མུའུ་ཁྲི་1.92ཟིན་པ་དང་ལོ་ཧྲིལ་པོར་སྔོག་འཐུ་ཆོག་པའི་རྒྱ་ཁྱོན་མུའུ་ཁྲི་1.2ཟིན་བཟོ་ཡོད་པ་རེད།

ཞིང་པར་འབབ་འཕར་དང་གྲོང་གསེབ་ཕྱུག་འགྱུར་ལ་སྐུལ་འདེད་གཏོང་བའི་ཐད་ཀྱི་ཇ་ལོའི་ནུས་པ་གང་ལེགས་འདོན་ཆེད། ཉེ་ཆར་རང་སྐྱོང་ལྗོངས་ཞིང་ལས་ཚན་རིག་ཁང་སྔོ་ཚལ་ཞིབ་འཇུག་སུའོ་ཡི་ཚན་རྩལ་མི་སྣ་ཞིང་ནང་དུ་བསྐྱོད་དེ་ས་གནས་ས་ཐོག་ཏུ་ཚད་ལྡན་གྱི་ཇ་ལོ་འཐུ་སྟངས་བསླབས་པ་དང་གྲོང་མིར་འགྲེལ་བཤད་དང་མཛུབ་ཁྲིད་ཞིབ་ཚགས་བྱས་པས། ཇ་ལོ་འཐུ་བའི་སྤུས་ཚད་དང་ལས་ཕྱོད་ཆེ་རུ་ནུས་ལྡན་ཕྱིན་ནས་ཇ་ལོ་འདེབས་མཁན་ཞིང་པས་ལུགས་དང་མཐུན་པའི་ཇ་ལོ་འཐུ་བ་དེས་ཇ་ལོའི་སྤུས་ཚད་དང་ཇ་སྡོང་སྐྱེ་འཚར་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པའི་ངོས་འཛིན་གང་ལེགས་ཐུབ་ཡོད་པ་རེད།