ཡུལ་ཚོ་ཆུང་ཆུང་། རིན་ཆེན་མཚོ་སྐྱིད།(ཐེམ་ཆེན།)

གསར་འགྱུར་སྤེལ་དུས། 　【2022-06-17 09:00:00】

ཡུལ་ཚོ་ཆུང་ཆུང་དེར།

ང་རང་དགའ་སའི་རོལ་རྩེད་ཁང་མེད།

ང་རང་དགའ་སའི་ལུས་རྩལ་ཁང་ལྷག་ཏུ་མེད།

ཡུལ་ཚོ་ཆུང་ཆུང་དེར།

ཅི་ལྟར་བལྟས་ཀྱང་དུད་ཁྱིམ་བཅུ་སྐོར་ལས་མི་བརྒལ།

ཅི་ལྟར་བརྩིས་ཀྱང་མི་བུ་བརྒྱ་སྐོར་ལ་མི་འབུད།

ཡུལ་ཚོ་ཆུང་ཆུང་དེར།

སྲང་མགོ་ནས་སྲང་རྔའི་བར་དུ།

མི་ཤེས་པ་གཅིག་ཀྱང་མི་འདུག

འོན་ཀྱང་།

ངས་ཡུལ་ཚོ་ཆུང་ཆུང་དེ་རྒྱུན་དུ་དྲན་ཡོང་།

ངས་དེ་རུ་ཡོད་པའི་གཉེན་ཉེ་ཚོའི་བརྩེ་བ་དྲོན་མོ་དེ་དྲན་ཡོང་།

ངས་དེ་རུ་ཡོད་པའི་ཁྱིམ་མཚེས་ཚོའི་དུངས་བ་ཟབ་མོ་དེ་དྲན་ཡོང་།

ངས་དེ་རུ་ཡོད་པའི་རང་བྱུང་ཁམས་ཀྱི་དབྱངས་རྟ་སྙན་མོ་དེ་དྲན་བྱུང་།

ངས་དེ་རུ་ཡོད་པའི་རང་དབང་རང་རྒྱའི་འཚོ་བ་སྐྱིད་པོ་དེ་དྲན་བྱུང་།

ད་ལྟའི་ཆར་ངས་རང་ལ་དབང་བའི་ཁང་བརྩེགས་ཀྱི་གྲུ་ཟུར་འདིར།

་ཡུལ་ཚོ་ཆུང་ཆུང་ཁྱོད་རང་ཤིན་ཏུ་དྲན་ཡོང་།

ངས་རང་ཉིད་ལ་གཤོག་པ་ཐོགས་ཏེ་ཁྱོད་ཀྱི་ཕྱོགས་ལ་འཕུར་ན་བསམ།

ངས་རང་ཉིད་འདི་ཆུ་བོ་ཞིག་ཏུ་སྤྲུལ་ཏེ་ཁྱོད་ཀྱི་ཕྱོགས་སུ་བཞུར་ན་བསམ།

ངས་རང་ཉིད་ཀྱི་རྩོམ་རྩལ་འདི་རྒྱས་ཏེ་ཁྱོད་ལ་སྙན་ངག་ཅིག་འབྲི་ན་བསམ།

མཛུབ་སྟོན་དགེ་རྒན།བོང་སྟག་རི་ལུ།