ཁོང་ནི།ང་ཚོའི་དགེ་རྒན་དེའོརིན་ཆེན་མཚོ་སྐྱིད། (ཐེམ་ཆེན།)

གསར་འགྱུར་སྤེལ་དུས། 　【2022-06-17 09:00:00】

ཁ་བྱང་འདི་བྲིས་མ་ཐག

ང་ལ་དོགས་སློང་དང་གདམ་ཀའི་དཀའ་ཁག་ཅི་ཡང་མ་བྱུང་།

འོན་ཀྱང་ང་རང་སྔར་བཞིན་འདང་རྒྱག་གི་རྙི་ལ་ཚུད།

རྒྱུ་མཚན་ངས་སློབ་ཆུང་གི་འཚོ་བར་ཕྱིར་འདང་ཕྲན་ཙམ་གནང་།

ངས་ཡི་གེ་བརྒྱ་ཕྲག་འབྲི་སའི་ཤོག་བུའི་སྟེང་ལ།

རང་ཉིད་ཀྱི་གསལ་བྱེད་སུམ་ཅུ་མི་ཤོང་བའི་རྣམ་པ་དྲན།

སྐབས་འདིར་ང་དབང་མེད་དུ་གད་མོ་ཤོར།

གད་མོ་དེས་ངའི་ཀླད་པའི་འཆར་ཡོལ་ངོས་ལ་ཁོང་ལགས་ཀྱི་གཟུགས་བརྙན་བྲིས་ཡོང་།

ཐོག་མར་ངས་སློབ་གྲྭ་སོ་མ་འཚོགས་པའི་རྣམ་པ་དྲན་བྱུང་།

སློབ་གྲྭའི་ཅོང་བརྡ་དང་མཉམ་དུ་འབྲུག་བྱམས་ཀྱི་ངུ་སྐད་གྲགས་ཡོང་།

འབྲུག་བྱམས་ཀྱི་སྤོ་བོ་སློབ་ཁང་གི་སྒོ་ལ་སོང་མ་ཐག

འབྲུག་བྱམས་དང་རྒན་ལགས་ཀྱིས་བདའ་རེས་བྱེད་མགོ་བརྩམས།

མི་བུ་སུ་ཞིག་ཡིན་རུང་ཐོག་མར་སློབ་གྲྭ་འགྲིམས་དུས་འདི་འདྲ་ཞིག་ཡིན་ཡང་སྲིད།

གང་ལྟར་འབྲུག་བྱམས་ནི་ང་ཚོའི་འཛིན་གྲྭའི་མི་སྣ་རྟགས་ཅན་དེ་ཡིན།

རིམ་བཞིན།

ངས་སློབ་གྲྭའི་སྔོ་ཚོད་ཉོ་བྱེད་ཀྱི་རླངས་འཁོར་ཆུང་ཆུང་དེ་དྲན།

དེ་ནི་ཕས་ཁཱ༼ 皮卡༽ ལྗང་ནག་ཅིག་ཡིན།

སློབ་གྲྭའི་དངོས་པོ་གཞན་ལས།

ཕས་ཁཱ་དེར་ང་ལ་འདང་ལྷག་མ་ཞིག་ཡོད།

རྒྱུ་མཚན་ནི།

དེའི་ངེད་ཅག་ལ་བརྗེད་ཐབས་བྲལ་བའི་ཕྱིར་དྲན་བསྐྲུན་ཡོད།

ང་ཚོས་དེ་སྐོར་ཏེ་ཤ་མོ་འཐུ་རུ་འགྲོ་མྱོང་།

ང་ཚོས་དེ་སྐོར་ཏེ་རྡོ་ཁྲིར་འཇལ་དུ་འགྲོ་མྱོང་།

ང་ཚོས་དེ་སྐོར་ཏེ་བཀྲ་ཤིས་འབྱུང་གནས་ལ་འགྲོ་མྱོང་།

ཁྱོད་ཀྱིས་མི་ལྔ་བཙོག་ས་ཅན་གྱི་རླངས་འཁོར་ཆུང་ཆུང་ཞིག་ཏུ་མི་ཉེར་གཅིག་བརྫངས་པའི་བདེ་སྐྱིད་དེ་དྲན་ནམ།

ཁྱོད་ཀྱིས་སྔ་མོ་ཞོགས་རྩལ་རྒྱུགས་དུས་སློབ་གྲོགས་ཚོ་དང་ལྷན་དུ་ས་འཇོག་རྡོ་འཇོག་བྱས་པ་དྲན་ནམ།

ཁྱོད་ཀྱིས་ཉིན་གུང་ཆུ་ཁ་རུ་རྐང་ལག་བཀྲུ་དུས་སློབ་གྲོགས་ཚོ་དང་ལྷན་དུ་ཆུ་རྩེད་བྱས་པ་དྲན་ནམ།

ཁྱོད་ཀྱིས་ཕྱི་དྲོ་རི་མགོ་རུ་སོང་སྟེ་སློབ་གྲོགས་ཚོ་དང་ལྷན་དུ་མེ་ཏོག་གི་རྒྱན་ཆ་བསླུས་བ་དྲན་ནམ།

གང་ལྟར་ངས་འདི་དག་གམ་ཡང་ན་འདི་ལས་ལྷག་པའི་འཚོ་བ་མང་པོ་ཞིག་གསལ་ལེར་དྲན་ཡོང་།

རྒྱུ་མཚན་ནི་གཞན་གང་ལ་ཡང་རག་ལས་མེད་པར་ང་ལ་ཁོང་ལྟ་བུའི་དགེ་རྒན་ཞིག་ཡོད།

འདི་ལྟར་རིམ་བཞིན་ང་རང་ཕྱིར་ཆུང་དུས་ཀྱི་འཚོ་བའི་ཀློང་དུ་ཚུད།

གློ་བུར་ང་རང་རྨོངས་གཉིད་ལས་སད་པ་བཞིན།

ཡང་བསྐྱར་ཁོང་ལགས་ཀྱི་གཟུགས་བརྙན་ཡིད་ལ་འཁོར།

ཡིད་སྐྱོ་བ་ཞིག་ལ་ད་ཐེངས་ཐེངས་སྔོན་མ་དང་མི་འདྲ་བར་ངའི་སེམས་ལ་ན་ཟུག་ཅིག་སྐྱེས་ཡོང་།

མིག་རྡེབ་དབང་ཙམ་གྱིས་ལོ་བརྒྱད་འདས་ཟིན།

ལོ་འདི་གར་ངས་ཁོ་ལགས་ཐེངས་འགར་མཐོང་མྱོང་།

འོན་ཀྱང་ངས་ཁོང་གི་འཛུམ་མདངས་མཐོང་མ་མྱོང་།

འོན་ཀྱང་ངས་ཁོང་གི་དགོད་སྒྲ་ཐོས་མ་མྱོང་།

གོ་ཐོས་ཡིན་ན།

ངེད་ཅག་མཐར་ཕྱིན་པའི་དུས་དེ་ནས་བཟུང་།

ཁོང་གི་འཚོ་བ་ལ་ཁ་དོག་མི་འདུག་ཟེར།

དེ་ཅི་ཁག

མི་ལོ་དྲུག་པོ་དེའི་རིང་ཁོང་གིས་ངེད་ཅག་མིག་གིས་འཚོས་ཡོང་།

ཁོང་ནི་ང་ཚོའི་འཛིན་གྲྭ་དེའི་གདུང་འདེགས་ཀྱི་ཀ་བ་དེ་ཡིན།

ཁོང་ནི་ང་ཚོའི་འཛིན་གྲྭའི་རྒྱབ་རི་བཀན་མོ་དེ་ཡིན།

ཁོང་ནི་ང་ཚོར་མི་གཙང་མ་ཡང་མ་ཞིག་བྱེད་དགོས་ཚུལ་གྱི་ས་བོན་འདེབས་མཁན་དེ་ཡིན།

ཁོང་ནི་མི་བུ་ཉེར་གཅིག་གིས་གྲུབ་པའི་ཁྱིམ་ཚང་འདིས་ཁྱིམ་བདག་ཡིན།

ཁོང་ནི་བདེ་སྐྱིད་ལྡན་པའི་ཕྱིར་དྲན་འདིས་ཁྲོད་ཀྱི་མི་སྣ་གལ་ཆེན་དེ་ཡིན།

ཁོང་ནི།ང་ཡི་དགེ་རྒན་ཏེ།

ཁོང་ནི།ང་ཚོའི་དགེ་རྒན་དེའོ།།

མཛུབ་སྟོན་དགེ་རྒན།བོང་སྟག་རི་ལུ།