ཆབ་མདོ་གྲོང་ཁྱེར་ཡུལ་སྐོར་ཁོངས་གཏོགས་ཀྱི་མི་སྣས་2022ལོའི་ཡུལ་སྐོར་འཕེལ་རྒྱས་ཁྱབ་ཁོངས་དང་ཡུལ་སྐོར་ལས་རིགས་ཀྱི་དོ་དམ་སྦྱོང་བརྡར་སྒྲུབ་པ།

གསར་འགྱུར་སྤེལ་དུས། 　【2022-07-15 09:00:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཆབ་མདོ་གྲོང་ཁྱེར་གྱི་ཁྱབ་ཁོངས་ཀྱི་ཡུལ་སྐོར་འཕེལ་རྒྱས་དང་སྨར་ཁམས་གནའ་བོའི་ཚྭ་ཞིང་5Aརིམ་པའི་མཛེས་ལྗོངས་ཁུལ་གཏོད་པའི་ལས་དོན་ལ་མགྱོགས་མྱུར་སྐུལ་འདེད་གཏོང་ཆེད། ཆབ་མདོ་གྲོང་ཁྱེར་གྱི་ཡུལ་སྐོར་ཁྱབ་ཁོངས་ཀྱི་དོ་དམ་མི་སྣའི་ལས་ཀའི་ཆུ་ཚད་སྔར་བས་མཐོ་རུ་གཏོང་བ་དང་། ཆབ་མདོ་གྲོང་ཁྱེར་གྱི་ཡུལ་སྐོར་ལས་གཉེར་མི་སྣའི་ཞབས་ཞུའི་སྤུས་ཚད་དང་ཞབས་ཞུའི་ཆུ་ཚད་ཟམ་མི་ཆད་པར་མཐོ་རུ་གཏོང་པ་དང་། ཟླ་6ཚེས་27ཉིན་ནས་ཟླ་7ཚེས་9ཉིན་བར་ཁྲུང་ཆིང་གྲོང་ཁྱེར་རིག་གནས་དང་ཡུལ་སྐོར་འཕེལ་རྒྱས་ཨུ་ལྷན། ཁྲུང་ཆིང་གྲོང་ཁྱེར་གྱི་དུས་ཁག་དགུ་པའི་བོད་སྐྱོར་ལས་དོན་རུ་ཁག་གི་རྒྱབ་སྐྱོར་ཤུགས་ཆེན་འོག ཆབ་མདོ་གྲོང་ཁྱེར་ཡུལ་སྐོར་འཕེལ་རྒྱས་ཅུས་ཀྱིས་སྣེ་ཁྲིད་དེ་གྲོང་ཁྱེར་ཐད་གཏོགས་འབྲེལ་ཡོད་ཚན་པ་དང་ཆུས་དང་རྫོང་རིག་གནས་ཡུལ་སྐོར་ཅུས（ཡུལ་སྐོར་འཕེལ་རྒྱས་ཅུས）ཀྱི་ལས་བྱེད་ལས་བཟོ་དང་དེ་བཞིན་ཡུལ་སྐོར་དང་འབྲེལ་བ་ཡོད་པའི་ཁེ་ལས་ཀྱི་འགན་འཁུར་བ་30ལྷག་ཙམ་ཁྲུང་ཆིང་དུ་ལས་སྒོའི་སྦྱོང་བརྡར་ནང་ཞུགས་པ་རེད།

ད་ཐེངས་ཀྱི་སྦྱོང་བརྡར་ལ་ཁྲུང་ཆིན་གྲོང་ཁྱེར་རིག་གནས་དང་ཡུལ་སྐོར་ཨུ་ཡོན་ལྷན་ཁང་དང་། ཁྲུང་ཆིན་གྲོང་ཁྱེར་རིག་གནས་དང་ཡུལ་སྐོར་སྦྱོང་བརྡར་ལྟེ་གནས་བཅས་ཀྱིས་སློབ་ཚན་ལ་གྲ་སྒྲིག་གང་ལེགས་དང་འཆར་འགོད་ཞིབ་ཚགས་བྱས་ཡོད། རིགས་པའི་གཞུང་ལུགས་ཀྱི་སློབ་ཚན་སློབ་སྦྱོང་བྱ་དགོས་ལ། ས་གནས་ས་ཐོག་ཏུ་ལྟ་སྦྱོང་ཡང་བྱས་དགོས་ཀྱི་ཡོད། སློབ་མ་རྣམས་སྔ་རྗེས་སུ་ཁྲུང་ཆིང་གྲོང་ཁྱེར་གྱི་ཝུའུ་ཧྲང་དང་། ཧྥེང་ཅེ། ཡུན་དབྱང་། ཧྲི་ཀྲུའུ། ཝུའུ་ལུང་། ཧྲ་ཕིན་པ་སོགས་ཆུས་དང་རྫོང་དུ་བསྐྱོད་དེ་མཛེས་ལྗོངས་ཁུལ་གྱི་5Aརིམ་པ་གསར་སྐྲུན་དང་། མཛེས་ལྗོངས་ཁུལ་གྱི་འཆར་འགོད་དང་ཚད་གཞི་ཅན་འཛུགས་སྐྲུན། དམངས་སྡོད་མགྲོན་ཁང་འཛུགས་སྐྲུན། རིག་གནས་ཡུལ་སྐོར་འཁྲབ་སྟོན་རྣམ་གྲངས་ཀྱི་ཐོན་རྫས་གསར་སྤེལ་དང་ཡུལ་སྐོར་དབུལ་སྒྲོལ། མཛེས་ལྗོངས་ཁུལ་གྱི་གཉེར་སྐྱོང་དོ་དམ། ཡུལ་སྐོར་དྲན་རྟེན་དངོས་རྫས་གསར་སྤེལ་སོགས་ཀྱི་ཐད་ཡུལ་དངོས་སུ་སློབ་སྦྱོང་དང་བཞུགས་མོལ་སྤེལ་རེས་བྱས་པ། ཁྲུང་ཆིང་གྲོང་ཁྱེར་རིག་གནས་ཡུལ་སྐོར་འཕེལ་རྒྱས་ཀྱི་བརྒྱུད་རིམ་ནང་གི་སྔོན་ཐོན་བྱེད་སྟངས་དང་ལས་ཀའི་ཉམས་མྱོང་ལ་སློབ་སྦྱོང་བྱས་པ་བརྒྱུད་སློབ་མའི་རིགས་པའི་གཞུང་ལུགས་ཀྱི་རྨང་གཞི་དང་ལས་སྒོའི་ཆུ་ཚད་སྔར་བས་བརྟན་དུ་ཕྱིན་ནས་སླད་ཕྱིན་ཆབ་མདོ་གྲོང་ཁྱེར་གྱི་ཡུལ་སྐོར་ཐོན་ལས་འཕེལ་རྒྱས་ལ་དཔྱད་གཞིར་འཛིན་པའི་ཉམས་མྱོང་ཡག་པོ་ཞིག་མཁོ་འདོན་བྱས་ཡོད།