གཙང་པ་དཔོན་གཡོག་གཉིས།

གསར་འགྱུར་སྤེལ་དུས། 　【2022-08-09 09:00:00】

གནའ་སྔ་མོ་གཙང་པ་དཔོན་གཡོག་གཉིས་པོས་ལྷ་སར་ཁ་མཆུ་རྒྱག་པར་ཡོང་། སྐུ་ངོ་ཁོང་གིས་རྟ་ཕོར་བཞོན་པ་དང་། གཡོག་པོ་ཁོ་ལ་རྒྱབ་ཏུ་ཁ་མཆུ་རྒྱག་ཆེད་ཀྱི་ཡིག་ཆ་གང་ཡོད་བསྐུར་ནས་ལམ་ལ་ཆས། སྐུ་ངོ་མཆོག་གིས་རྣམ་ཀུན་གཡོག་པོར་ཟས་གྲོད་པ་རྒྱགས་པ་ཞིག་སྟེར་གྱི་མེད་ཙང་། ཉིན་ཞིག་ཆུ་ཡུར་ཞིག་བགྲོད་པའི་སྐབས་དང་བསྟུན་ནས་གཡོག་པོས་མཆོང་རྒྱག་ཅིག་བརྒྱབ་སྟེ་ཆེད་མངགས་ལྟག་དགྱེལ་ལོག་ཁུལ་གྱིས་ཡིག་ཆ་རྣམས་ཆུ་ལ་སྦངས་པར། སྐུ་ངོ་ཡིས་གཤེ་གཤེ་བཏང་བས་ན། གཡོག་པོས། སྐུ་ངོ་ལགས། ཐུགས་དགོངས་དག བདག་གྲོད་པ་ལྟོགས་རང་དྲགས་ནས་དམར་ཐོམ་མེར་འགྱེལ་བྱུང་། ཡིག་ཆ་རྣམས་ལམ་སེང་སྐམ་ཐུབ་པ་བདག་གིས་སྨོན་ལམ་བརྒྱབ་ཆོག་ཅེས་ཞུས་ཏེ། ཡིག་ཆ་རྣམས་བཀྲམ་ནས་སྐད་ཤུགས་གང་ཡོད་ཀྱིས། བདག་ཅག་གཙང་པ་དཔོན་གཡོག་གཉིས་ཀྱི་བསོད་བདེ་གང་ཡོད་ད་ལྟ་རང་སྐམ་པར་ཤོག་ཅེས་ལབ་པ་ན། སྐུ་ངོ་ཡིས། ལྟས་ཕྲུག་ཁྱོད་ཀྱིས་སྨོན་ལམ་ངན་པ་འདི་འདྲ་རྒྱག་མི་དགོས་ཞེས་ཞུས་ནས་མུ་མཐུད་དེ་ལམ་ལ་ཆས།

ལྷ་སར་འབྱོར་རྗེས་ཀྱི་ཉིན་ཞིག་ཐུགས་སྤྲོ་གཏོང་སར་མི་མང་པོ་འཛོམས་ཡོད་སྟབས། སྐུ་ངོ་ཡིས་གཡོག་པོ་སྐད་བཏང་སྟེ། ཁོ་རེ། བདག་ཚོའི་གཞིས་ཀྱི་ཚོམས་ཆེན་ལ་ཀ་བ་ག་ཚོད་ཡོད་ཅེས་མ་དྲན་པའི་ཚུལ་གྱིས་དྲིས་པར། གཡོག་པོས། ཀ་བ་ཉེན་ཁ་ཅན་དེ་བརྩིས་ན་ཀ་བ་གཉིས་ཡོད་ཅེས་ཞུས། དགོང་མོ་གནས་ཚང་ལ་སླེབས་རྗེས་སྐུ་ངོ་ཡིས་གཡོག་པོར། ཁྱོད་གླེན་རྟགས་ཚ་པོ་མ་བྱེད། སང་ཉིན་ངས་སྐད་ཆ་དྲིས་བྱུང་ན་མང་པོ་ཡོད་ལུགས་བརྗོད་དགོས་ཞེས་བཤད། ཕྱི་ཉིན་ཐུགས་སྤྲོ་གཏོང་སར་སྐུ་ངོ་ཡིས་གདེང་ཚོད་ཡོད་པའི་ངང་ནས་གཡོག་པོར། ཁོ་རེ། བདག་ཚོའི་སྒོས་གཞིས་རུ་བར་སེམས་ཅན་སྤུ་ནག་ག་ཚོད་ཡོད་ཅེས་དྲིས་པར། གཡོག་པོས་འཁོན་ལན་སློག་ཆེད་དུ། ལཱ་དགུ་བཅུ་གོ་དགུ་བྱུང་ན་བརྒྱ་ཐམ་པ་ཏག་ཏག་ཡོད་ཅེས་ལན་བཏབ་པར། སྐུ་ངོ་ཁ་སྐྱེངས་ནས་ཅི་བྱ་གཏོལ་བྲལ་དུ་གྱུར་བའོ།།