ཕྱིར་དྲན།

གསར་འགྱུར་སྤེལ་དུས། 　【2023-04-28 11:12:00】

ཐོག་མ་མིན་ལ་མཐའ་མར་གྱུར་པའི་མེ་འཁོར་ས་ཚུགས་ནས་མི་ཞིག་ལ་སྐྱེལ་མ་གནང་བ་བཞིན། སྐད་ཅིག་མའི་འཛོམས་པ་མེད་པའི་བྲལ་བ་ནི་ཇི་འདྲའི་སྙིང་ལ་གཟིར་བ་ཞིག དེ་ནས་བཟུང་ང་ཁོ་དང་ཁ་ཐག་ཇེ་རིང་ཡིན་པར་སེམས་ཀྱིས་ཚོར་ལ། སྟོད་ཉི་མ་ལྷ་སར་འགྲོ་བའི་ལམ་ཐག་གིས་ཀྱང་ང་ལ་ཡང་ཡང་ར་སྤྲོད་བྱེད་བཞིན་མཆིས།

དེ་ནི་ཉི་ཟླ་ལྷན་འཛོམས་ཀྱི་ཉིན་ཞག་མང་པོ་ཞིག་ལ་ངས་ཁྱོད་རང་དྲན་པའི་རྗེས་ཀྱི་ཉིན་མོ་ཞིག་སྟེ། གཏམ་རྒྱུད་ཅིག་ལ་དབུ་ཁྱུད་འབྲི་བཞིན་སེམས་ཀྱི་རླབས་རྒྱུད་ལ། དྲན་ཤེས་ཀྱི་རླུང་གིས་ཁྱེད་ཉིད་ཤུགས་ཀྱིས་གཡོས། ཁྱེད་རང་དྲན་པ་དང་ཁྱོད་དང་སྐྱ་འཐབ་པའི་བརྕེ་དུང་གི་གཏམ་རྒྱུད་དེ་དྲན་པ་ནི་བཟི་ཁ་བཙན་དྲགས་པའི་བདུད་རྩི་ཁམ་གང་མུ་ནས་མུ་རུ་བཏུང་པ་དང་ཀུན་ནས་འདྲ།

དགོང་མོ་དེའི་ཟླ་འོད་ཧ་ཅང་གསལ། དགུང་གི་སྐར་མས་ཀྱང་ཕན་ཚུན་ལ་མིག་བརྡ་བསྟན་པ་གཞན་གྱིས་མཐོང་ཡོད་ས་རེད། ཁོ་བོས་རྒྱང་རིང་ནས་ང་ལ་འཕྲིན་ཐུང་ཞིག་སྐུར། རྒྱང་རིང་ཟེར་དོན་ཡང་ལེ་བར་སྟོང་ཕྲག་གིས་བཅད་པ་གཅིག་པུ་ག་ལ་ཡིན། ད་དུང་ནམ་ཞིག་ནས་བཟུང་བསྟུངས་མི་ཐུབ་པའི་སེམས་ཀྱི་བར་ཐག་ཅིག ནམ་སྨད་ཀྱི་ཆར་ཆེན་ཞིག་གིས་ན་ཁུག་གི་གུར་ཆུང་ཕྱི་བརྟོལ་ནང་བརྟོལ་བྱས། ད་དུང་མུ་མཐུད་དུ་བརླན་ནས་ཡོང་བཞིན་པ་ནི་ངའི་སེམས་ཀྱི་ཆེས་སྙི་ས་ན་སེམས་ཆུང་གིས་གཉོར་ཡོད་པའི་ང་དང་ཁོ་བོའི་བརྩེ་དུང་གི་གཏམ་རྒྱུད་ཡིན། སེམས་པ་དང་སེམས་པ་འདྲེས་མྱོང་པའི་ལོ་ཟླ་དང་ཁོ་བོའི་འཕྲིན་ཐུང་གང་ཡིན་ཡང་ལན་ཞིག་བཏབས་ན་ཧ་ཅང་འོས་པར་སྙམ། དེ་བས། ལན་ལ་འཕྲིན་རིང་ཞིག་འབྲི་མགོ་རྩམ། ངེད་གཉིས་ཀྱི་འདས་མ་ད་གསུམ་གླེང་། ཡིག་ངོར་ཕབ་པའི་ཡེ་གེ་དག་ཉོག་ཡོད་པར་འདོད་ནས་རི་འགོ་འགོས་ནས་ཁ་པར་ཞིག་གཏོང་རྩིས་བྱས། བསམ་བསམ་གི་མཐར། རེ་བཞག་གིས་སྦྲེལ་བའི་གཏན་འདུན་ལ་ཕྱི་ཐག་བྲལ་བ་ང་ཁོ་ན་ག་ལ་ཡིན་སྙམ་ནས་མཇུག་མཐར་ནམ་སྨད་ཀྱི་ཆུ་ཚོད་བཞི་ཡི་སྟེང་གི་ཡ་ལན་ཞིག་གིས་ཡོད་ཚད་ལ་བདེ་མོ་བཞག དེ་དུས་ནམ་སྨད་ཡིན་ལ། མི་ཡུལ་ལ་ཞག་གང་བོར་དྲག་ཆར་བབས།

སྐད་ཅིག་མ་དེར། བརྩེ་བ་དང་དུངས་པ་ལག་ནས་ཤོར་བའི་དཀར་ཡོལ་ཞིག་ལ་གས་ཁ་ཤོར་བ་བཞིན། གས་ཆག་མང་པོའི་སྲུབས་ཀ་ནས་ཐོར་བ་ནི་དུས་ཚོད་ཀྱིས་ཤུལ་དུ་བསྐྱུར་པའི་ཕྱིར་དྲན་གཅིག་པུ་ཡིན། དེ་ནས་བཟུང་། ཁྱོད་རང་དལ་བག་གིས། ང་དང་རྒྱང་དུ་གྱེས་ལ། ངས་ནི་འཇམ་ཐིང་ངེར་ཁྱེད་རང་དྲན་མགོ་ཚུགས། ཁྱེད་ཀྱིས་ཤེས་སམ། འདི་ནས་ཡར་དེད་ན་ཉི་འོད་ཀྱིས་གཙེས་པའི་ལེ་བར་སྟོང་ཕྲག་གི་མཚམས་སུ་མིང་མེད་པའི་རྨི་ལམ་ཞིག་ས་འོག་ཏུ་སྦས་མཁན་དེ་ང་ཡིན། དེ་ཡང་མིང་མི་ཐོགས་པའི་མཚན་མོ་ཞིག་ཡིན། ཀ་ངོ་མི་ཤེས་པའི་ཨ་མ་གཅིག་པུ་ལྷ་ས་ལ་རྐང་ཐང་དུ་འགྲོ་འདོད་ཡོད་པ་རྨི་ལམ་དུ་རྨིས་པ་ལྟར། ངས་ཀྱང་འུ་གཉིས་ཇོ་བོ་སེར་བོ་ལ་མཉམ་གཅིག་ཏུ་ཐོད་པ་གཏུགས་པའི་རྨི་ལམ་ཞིག་རྨིས་པ་ཡིན། རྨི་ལམ་དེ་ནི་རྨི་ལམ་ཡིན་པར་སྐྲག་ལ། རྨི་ལམ་གྱི་ནང་དུ་རྨི་ལམ་དེ་ལ་སྟ་གོན་ཀྱང་ཡང་ཡང་བྱས། སྤྱིར་འུ་གཉིས་ངོ་ཕྲད་པ་ནི་གོ་འཛོལ་ཞིག་ཡིན། འོན་ཀྱང་། གོ་འཛོལ་ཞིག་གིས་ཡོད་ཚད་ལ་འཕལ་ག་འཕྲོད་མྱོང་པ་ལ་ངས་ནམ་ཡང་ཁས་ལེན་དང་བདེན་ཁ་སྟེར་བཞིན་ཡོད།

ཁོ་རེ། ལམ་དུ་ཆས་སོང་ཚེ། འཁྲེང་ཞེན་གྱི་ཕྱིར་མིག་འཕངས་ན་མི་འོས་ཟེར་བ་ཁྱོད་ཡིན་ནམ། མི་ཚོགས་དང་མྱི་ཁའི་རྫབ་པའི་ལམ་ཕྲན་དེར། ཁྱོད་ང་དང་རྒྱབ་དུ་གཏད་པའི་ཚེ། མཚན་མོ་ཞིག་གི་རིང་ལ། སྡོང་མགོའི་ལོ་མ་དག་ཉམ་ཆུང་གིས་ས་རུ་བྲུལ་ཞིང་། མི་ཡུལ་གྱི་བརྩེ་དུངས་ཤིག་ལ་གླུ་གཞས་ཤིག་གིས་མྱ་ངན་ཞུས། དེ་ནས་ཟླ་དྲུག་པའི་མེ་ཏོག་སེར་ཆེན་ཞིག་ཀྱང་དེ་ལྟར་སྐམ་ལ་ཉེ།