ཁྱོད་ཀྱི་མིང་ལ་མཚོ་འུར་ལུ་ཟེར།

གསར་འགྱུར་སྤེལ་དུས། 　【2023-04-28 11:12:00】

གསེར་མདོག་གི་ཉི་མ་སེར་པོ་ཤར་གྱི་ལྷུན་པོའི་རྩེ་ནས་འཛུམ་གྱིས་ཤར་བ་དང་ལྷན་དུ་ཁ་ཞེང་ཆེ་བའི་རུ་སྡེ་སྨུག་པོ་དེ་རུ་དུད་ཞགས་ཀྱི་ཨ་ལོང་གོར་མོ་ཕྱོགས་བསླད་མགྲོན་པོ་ཇི་བཞིན་སྤྱི་བསེར་རླུང་བུའི་ངལ་བར་མ་འཛེམ་པར་དལ་གྱིས་མཁའ་དབྱིངས་ལ་རྒྱུ་ཞིང་འཐོར་དུས།ཏ་མ་ལའི་འདུ་འཛི་བྲལ་ཞིང་སྐར་ཚོགས་ཀྱི་ཞལ་གཟུགས་མིག་ལ་མི་མངོན་པའི་ནམ་མཁའ་འདི་ཇི་འདྲའི་དྭངས་ཤིང་གཡའ་དག་པ་ཞིག་རེད་ཨང་།རྟ་བདུན་དབང་བོའི་ཕྱག་ཟུང་ལས་སྦྱིན་པའི་འོད་ཀྱི་ཟེར་མའི་འཛུམ་ཆུང་དེའང་ས་གཞིའི་ངོས་དང་གཙང་བོའི་འགྲམ་དག་སྟེ་སྨྱུག་རྩེར་བསྐྱོད་པར་སོར་རྩེ་མི་འདར་བ་སུ་ཞིག་གི་དཔའ་དང་སྤོབས་པའི་པིར་རྩལ་ལས་འཁྲུངས་འདྲའི་ཕ་ཡུལ་གྱི་ཕྱི་ནང་ཀུན་ལ་བྱིལ་བྱིལ་ལན་འགར་བྱེད་དུས།མཐའ་བཞིའི་ཆུ་ཕྲན་དག་གི་འབབ་ཡུལ་དུ་གྱུར་བའི་ཁྱོད་རང་ངའི་ཕ་ཡུལ་དུ་འོད་ཆེམ་ཆེམ་གྱིས་གནས་པ་མཐོང་བྱུང་།སྐབས་དེར་ངས་དྭངས་གཙང་བྱིས་དུས་ཀྱི་འཚོ་བ་ཡིད་ངོར་ཡང་ཡང་དྲན་ཡོང་སྟེ།དེ་དུས་ཁྱོད་ཀྱི་ཉེ་འགྲམ་དུ་རྡོ་ཆས་ཀྱི་རྩེད་ར་སྒྲིག་ཅིང་རྡེའུ་དཀར་ནག་ནོར་ལུག་བྱས་མྱོང་བ་དེ་དྲན་ཞིང་།མེ་ཏོག་ཐང་མར་བརྡལ་བའི་ཁུག་ཏུ་འགྱེལ་ལོག་བྱས་ཤིང་།སྐབས་རེར་ལ་ལ་གཡུག་ཅིང་ལ་ལ་བཏུས་ནས་ཚོམ་དང་ཚོམ་དུ་བཞད་པའི་མེ་ཏོག་དག་ནི་ང་ཁོ་ནའི་གདམ་ག་ཡིན་པར་སྣང་བ་དེ་དྲན་ལ། རྨོ་མོས་ཨ་ནེ་དྲེད་མོང་དང་རི་བོང་ཆུང་ཆུང་ཞེས་གནའ་གཏམ་བཤད་མྱོང་བ་དེ་ལྷག་ཏུ་དྲན་ཡོང་། གཡའ་དག་པའི་ནམ་མཁའི་མདངས་དང་སྒྲིན་ཕོད་པའི་ཁྱོད་རང་།སུ་ཞིག་གིས་ང་ཚོར་བཤམས་པའི་དྭངས་གཙང་གི་མཆོད་པ་དང་གང་ཞིག་གིས་ང་ཚོར་བཞག་པའི་རྟག་བརྟན་གྱི་རྟེན་སྐལ་ཡིན། ད་དུང་། དབྱར་གྱི་སྤང་ལྗོངས་སྟེང་དུ་ཁུ་སིམ་མེར།སྔོ་ལྡེམ་མེར།འོད་འཁྱིལ་ལེར་བགྲང་བྱ་སྟོང་ཕྲག་དུ་མའི་འདས་སོང་གི་བྱུང་བ་མཐའ་དག་ལུས་ངག་ཡིད་གསུམ་གྱི་ཟབ་སར་གསལ་གསལ་དག་དག་གིས་བརྐོ་དུས། ཁྱོད་རང་ཉ་གསེར་མིག་གི་རྣམ་ཤེས་འཁྱིལ་སའི་དག་ཞིང་དང་བྱ་འདབ་ཆགས་ཀྱི་གསང་ཚིག་བསྐོང་སའི་ཕོ་བྲང་ཡིན་ཟེར་བར་སུ་ཞིག་གི་མགྲིན་པ་བརྣངས་དགོས་སམ། རེད་དེ།མཚོ་འུར་ལུ།འུར་མགོ་གངས་ལ་ཟུག་ཀྱང་འུར་སྐད་རླུང་གིས་མ་ཟིན།འུར་རྔ་ཀླུ་ལ་དྲངས་ཀྱང་འུར་སྒྲ་བརླན་གྱིས་མ་ཟིན། དུས་ལ་བྲིས་པའི་རི་མོ་ནམ་མཁའི་གཟུགས་ལ་འཆར་ཞིང་བསྐལ་བར་འཐག་པའི་རི་མོ་རླབས་རིས་གསེབ་ན་གསལ་ངེས།འུར་ལུ་ཡ།མཚོ་འུར་ལུ།ང་ཡི་མ་མཚོ་ཕྱུག་མོ།ང་ཡི་བླ་མཚོ་སྔོན་མོ།