ཡུལ་གྱི་བརྩེ་བ་ལས་འཁྲུངས་པའི་ནས་འབྲུ་རྡོག་གཅིག

ནག་བཟའ་སྐར་བརྒྱ། （ཐེམ་ཆེན）

གསར་འགྱུར་སྤེལ་དུས། 　【2023-04-28 11:12:00】

སླ་ངའི་དྲི་མག་དང་བྲལ་ཡོད་ནི་ཞིག་མིན་ན་ཐང་།

ཐབ་ཀའི་ཡར་སྒྱིད་དང་མར་སྒྱིད་ན་ཁོམ་གྱིན་མེད་པའི་

རྩག་པ་གོན་མི་ཤེས་པའི།

འབྲོག་མོ་དེའི་ཆོ་ལོ་ཁུར་ཡོད་ན་ཐང་།

ད་རུང་།

རླབས་ཆེན་ཨ་མ་ཞིག་གི་མཚན་ཉིད་ཀྱང་ཁུར་ཡོད་ན་ཐང་།

སྒྲོལ་མ། ཁྱོད་ནི་རི་རྒྱལ་ལྷུན་པོའི་འདབ་གཤོག་ནས།

ཡུལ་གྱི་བརྩེ་བ་ལས་འཁྲུངས་པའི་ནས་འབྲུ་རྡོག་གཅིག་ཡིན།

ད་རུང་། སྟག་ཤར་དག་གིས་བཙག་ཐག་མ་ཆོད་པའི།

བསིལ་ཆང་ཁམ་པ་དེ་ཡིན།

སྒྲོལ་མ། ཁྱོད་ནི་ཁེར་རྐྱང་དུ་བགྲོད་པའི་ཤྭ་བ་ཡུ་མོ་དེ་ཡིན་ལ།

ཤར་ལྷོ་ནུབ་བྱང་གང་ལ་ཡང་མི་འཁོར་བའི་ཤྭ་བ་ཡུ་མོ་དེ་ཡིན།

ཉིན་ཞིག ཁྱོད་ལ་ད་རུང་ཡང་སྐྲ་བདག་ཅིག་འབུད་ངེས།

དེ་དུས། ཁྱོད་ཀྱིས་ཀྱང་ད་སྐབས་ནང་བཞིན།

ངའི་སྙན་ངག་ལ་མཆོད་པ་འཕེན་སྲིད་དམ།