རུས་བཅོས་འཕྲུལ་མིས་ཆབ་མདོར་རྒྱང་བརྟེན་རུས་ནད་ གཤགས་བཅོས་ཐོག་མ་བྱས་པ་ལེགས་སྒྲུབ་བྱུང་བ།

གསར་འགྱུར་སྤེལ་དུས། 　【2023-05-09 09:00:00】

ཧོང་ཝེ་ཡིས་འཕྲུལ་མི་སྤྱད་དེ་གཤགས་བཅོས་བྱེད་བཞིན་པ།

ཟླ་5ཚེས་4ཉིན་གྱི་སྔ་དྲོའི་ཆུ་ཚོད་9དང་ཕྱེད་ཀ་ཙམ་ལ། ཆབ་མདོ་གྲོང་ཁྱེར་མི་དམངས་སྨན་ཁང་གཤགས་བཅོས་ཁང་དུ་ཁྲུང་ཆིང་གསོ་རིག་སློབ་ཆེན་ཞོར་གཏོགས་སྨན་ཁང་དང་པོའི་རུས་ནད་ཚན་ཁག་གི་ཀྲུའུ་རེན་ཧོང་ཝེ་ཡིས་རང་རྒྱལ་ནས་ཐོན་སྐྱེད་བྱས་པའི་རུས་ནད་གཤགས་བཅོས་འཕྲུལ་མི“ཧུང་ཧུའུ”ལ་བརྟེན་ནས་ནད་པ་བསོད་ནམས་དོན་གྲུབ་ལ་པུས་ཚིགས་གཡས་པ་བརྗེ་བའི་གཤགས་བཅོས་བྱས་ཡོད།

ཧོང་ཝེ་ཡིས། དེ་རིང་ང་ཚོས་རྒྱལ་ཐོན་རུས་ནད་གཤགས་བཅོས་འཕྲུལ་མི་སྤྱད་དེ་ནད་པར་གཤགས་བཅོས་བྱས་པ་ཡིན། དེ་ནི་མིག་སྔ་འཛམ་གླིང་ཐོག་ཅུང་སྔོན་ཐོན་གྱི་ལག་རྩལ་དང་འདུ་ཤེས་ཤིག་ཡིན་པས། གཤགས་བཅོས་ལེགས་འགྲུབ་ཡོང་རྒྱུར་རམ་འདེགས་བྱས་ཡོད། སླད་ཕྱིན་ང་ཚོས་རུས་ནད་གཤགས་བཅོས་འཕྲུལ་མི་ནད་ཐོག་སྨན་བཅོས་དང་ལྷག་པར་དུ་ང་ཚོའི་བོད་ལྗོངས་ཀྱི་གཞི་རིམ་སྨན་ཁང་ཁག་ཏུ་བེད་སྤྱོད་ཐུབ་རྒྱུའི་རེ་བ་ཡོད་ཅེས་བཤད།

གཤགས་བཅོས་དེ་བརྙན་ལམ་གྱི་རྣམ་པའི་ཐོག་ནས་དུས་ཡུན་ཆུ་ཚོད་གཅིག་ཙམ་འགོར་ཡོད། ཆབ་མདོ་གྲོང་ཁྱེར་གྱི་2023ལོའི་བོད་ཤར་རྒྱུད་ཀྱི་རུས་ཚིགས་དང་སྒལ་ཚིགས་རྨས་སྐྱོན་གྱི་རིག་གཞུང་གླེང་སྟེགས་ཀྱི་ཚོགས་ར་དང་ཁྲུང་ཆིང་ཚོགས་རའི་སྨན་པས་གཤགས་བཅོས་ཀྱི་བརྒྱུད་རིམ་ཧྲིལ་པོར་བལྟས་ཡོད།

ཐད་གཏོང་ལ་ལྟ་མཁན་ཁྲུང་ཆིང་གྲོང་ཁྱེར་གྱི་ཚོགས་སྒྲིག་རྣམ་པའི་བོད་སྐྱོར་སྨན་བཅོས་རུ་ཁག་གི་རུ་མི་ཁག་བཅུ་པ་དང་། སྨར་ཁམས་རྫོང་མི་དམངས་སྨན་ཁང་གི་འགོ་འཛིན་གཞོན་པ་ཝུའུ་ཁྲོན་གྱིས། བོད་ལྗོངས་ཀྱི་རྨང་གཞིའི་ཆ་རྐྱེན་བལྟོས་བཅས་ཀྱི་ཞན་པའི་དབང་གིས། རྫོང（ཆུས）ཁག་གི་སྨན་ཁང་ལ་གྲུམ་བུ་ཚིགས་ཆེན་ནད་སྨན་བཅོས་ཐད་ཀྱི་རྨང་གཞིའི་ཤེས་བྱ་འདང་གི་མེད། ཀྲུའུ་རེན་ཧོང་ཝེ་ཡིས་ང་ཚོར་འཕྲུལ་མི་སྤྱད་དེ་གཤགས་བཅོས་བྱེད་སྟངས་སློབ་སྟོན་གནང་བ་ལས། ང་ཚོར་དེའི་ཐད་ཀྱི་ཤེས་བྱ་གསར་པ་མང་པོ་ཤེས་བྱུང་ཞེས་བཤད་པ་རེད།

བསོད་ནམས་དོན་གྲུབ་མགྱོགས་མྱུར་དྲག་སྐྱེད་ཡོང་ཆེད།གཤགས་བཅོས་བྱས་པའི་ཉིན་དེའི་ཕྱི་དྲོའི་ཆུ་ཚོད་བཞི་པར། ཁྲུང་ཆིང་གི་བོད་སྐྱོར་སྨན་པ་ཁྲེང་ཆང་གི་མཛུབ་ཁྲིད་འོག བསོད་ནམས་དོན་གྲུབ་ཀྱིས་འགྲོ་སྐྱོད་རོགས་སྐྱོར་ཡོ་བྱད་ལ་བརྟེན་ནས་འགྲོ་སྐྱོད་བྱེད་འགོ་ཚུགས། བསོད་ནམས་དོན་གྲུབ་ཀྱི་གཅེན་པོས་སེམས་འགུལ་ཚད་མེད་ཐེབས་བཞིན་དུ། ལོ་དེ་དག་ནང་གཅུང་པོའི་རྐང་པར་ན་ཟུག་ཆེན་པོ་ལངས་ནས་གཉིད་ཀྱང་ཡག་པོ་ཁུག་མི་ཐུབ་པ་དང་། ལྷག་པར་དུ་ད་ལོ་ནས་བཟུང་འགྲོ་སྐྱོད་ཐད་དཀའ་ངལ་ཧ་ཅང་ཆེན་པོ་འཕྲད་པས། ལུས་སེམས་གཉིས་ཀར་མནར་གཅོད་ཆེན་པོ་ཕོག་ཡོད། ཏང་དང་སྲིད་གཞུང་ལ་ཐུགས་རྗེ་ཆེ་ཞུ་རྒྱུ་ཡིན། ཁྲུང་ཆིང་གི་བོད་སྐྱོར་སྨན་པས་ངའི་གཅུང་པོར་རིན་པ་མི་དགོས་པར་གཤགས་བཅོས་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་བཤད་པ་རེད།

ཤེས་རྟོགས་བྱུང་བར་གཞིགས་ན། སྤྱི་ལོ་2019ལོ་ནས་བཟུང་། ཁྲུང་ཆིང་གྲོང་ཨུད་དང་གྲོང་ཁྱེར་སྲིད་གཞུང་དང་། ཁྲུང་ཆིང་གྲོང་ཁྱེར་འཕྲོད་བསྟེན་བདེ་ཐང་ཨུ་ལྷན་གྱིས་སྣེ་འཁྲིད་དེ་སྒྲིག་འཛུགས་བྱས་པའི་“ཁྲུང་ཆིང་དང་བོད་ལྗོངས་དབར་གྱི་མཛའ་བརྩེ་ཟབ་མོ། ཡར་ལངས་པའི་བྱ་སྤྱོད”ཅེས་པའི་ཆེད་དོན་ལས་དོན་ཚོགས་ཆུང་སྔ་རྗེས་སུ་བོད་ལ་ཐེངས་6ཕེབས་པ་དང་། ནད་པ་150ལྷག་ཙམ་ལ་གཤགས་བཅོས་བྱས་ཡོད།

གཞན་ཡང་། ཆེད་དོན་ལས་དོན་ཚོགས་ཆུང་འདིའི་རྒྱབ་སྐྱོར་འོག ཟླ་5ཚེས་3ནས་ཚེས་7ཉིན་བར། ཆབ་མདོ་གྲོང་ཁྱེར་མི་དམངས་སྨན་ཁང་དང་ཁྲུང་ཆིང་གྲོང་ཁྱེར་སྨན་བཅོས་མཉམ་འབྲེལ་སྒྲིག་གཞིའི་སྨན་ཁང་གིས་མཉམ་འབྲེལ་ཐོག་རུས་ཚིགས་དང་སྒལ་ཚིགས་རྨས་སྐྱོན་གྱི་རིག་གཞུང་སྤེལ་རེས་བྱེད་སྒོ་བདེ་བླག་ངང་སྤེལ་བ་རེད། བྱེད་སྒོ་སྤེལ་རིང་ཆབ་མདོ་གྲོང་ཁྱེར་མི་དམངས་སྨན་ཁང་ཡང་ཁྲུང་ཆིང་གྲོང་ཁྱེར་རུས་ཚན་རིག་པའི་ཆེད་ལས་ཚན་ཁག་གི་མནའ་འབྲེལ་ནང་བདེ་བླག་ངང་ཞུགས་པ་དང་འབྲེལ། ཁྲུང་ཆིང་གྲོང་ཁྱེར་གྱི་མཇིང་ཚིགས་ནད་ཀྱི་ས་ཁོངས་རང་བཞིན་གྱི་ནད་ཐོག་སྨན་བཅོས་ལྟེ་གནས་ཀྱི་ནད་ཐོག་མཛུབ་ཁྲིད་ལྟེ་གནས་བཙུགས་པ་རེད།