བོད་ལྗོངས་ཆབ་མདོའི་ཁུལ་གསར་གྱིས་སྐྱེ་ཁམས་གསར་པ་བཏོད་པ།

གསར་འགྱུར་སྤེལ་དུས། 　【2023-07-18 09:00:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། “ཟླ་5པར་ང་ཚོས་ཆབ་མདོའི་ཁུལ་གསར་དུ་རྣམ་གྲངས་ལ་རྟོག་ཞིབ་བྱས་ཤིང་། འབྲེལ་མཐུད་ངོ་འཕྲད་གྲོས་མོལ་ཐེངས་དང་པོ་བྱས་པ་ནས་ཆབ་མདོ་ཁུལ་གསར་དུ་ཁེ་ལས་གཞིས་ཚུགས་པའི་བར་གཟའ་འཁོར་གཅིག་ལས་འགོར་མེད། དེ་ལས་ཆབ་མདོའི་ཁུལ་གསར་གྱིས་ཚོང་འགུགས་མ་འདྲེན་ལ་ཚད་མཐོའི་མཐོང་ཆེན་བྱེད་པ་དང་ལས་ཀའི་ལས་ཕྱོད་ཆེན་པོ་ལྡན་པ་མྱོང་ཚོར་ཐུབ་བྱུང”ཞེས་བོད་ལྗོངས་ཨང་པི་ཐེ་པའོ་ནུས་རྒྱུ་ཚན་རྩལ་ཚད་ཡོད་ཀུང་སིའི་སྤྱི་ཁྱབ་ཅིང་ལི་སུང་ཧུའེ་ཧྭ་ཡིས་བཤད།

བོད་ལྗོངས་ཨང་པི་ཐེ་པའོ་ནུས་རྒྱུ་ཚན་རྩལ་ཚད་ཡོད་ཀུང་སི་ནི་རྒྱལ་ཡོངས་ཀྱི་ཁག་གསུམ་པ་དང་བོད་ཀྱི་ཁག་དང་པོའི་ཆེད་ལེགས་ཁྱད་གསར་གྱི་ཁེ་ལས་ཤིག་ཡིན་པ་དང་། གཙོ་བོ་ཉི་འོད་ནུས་པའི་ཚ་ནུས་སོགས་རིག་ལྡན་ནུས་རྒྱུ་ཕྱོགས་བསྡུས་ལས་སྟེགས་ཀྱི་བློ་འདྲི་དང་། ཇུས་འགོད། ཞིབ་སྤེལ། གཉེར་སྐྱོང་སོགས་བྱེད་ཀྱི་ཡོད། སུང་ཧུའེ་ཧྭ་ཡིས“ཉེ་ཆར་ང་ཚོས་ཆབ་མདོའི་ཁུལ་གསར་དང་མཉམ་ལས་གྲོས་མཐུན་བཞག་ནས་མ་དངུལ་བཏང་སྟེ་ཆབ་མདོ་གྲོང་ཁྱེར་གྱི་ནུས་རྒྱུ་གཙང་མའི་དྲོད་རླངས་མཁོ་འདོན་ཁེ་ལས་དང་པོ་བསྐྲུན་རྒྱུ་དང་། ཆབ་མདོའི་བོད་ཤར་རྒྱུད་ཀྱི་ནུས་རྒྱུ་གཙང་མའི་རྟེན་གཞིའི་ཐོན་ཁུངས་ཀྱི་ལེགས་ཆར་བརྟེན་ནས་ཁེ་ལས་ཀྱི་ལག་རྩལ་ལེགས་ཆ་འདོན་སྤེལ་བྱས་ཏེ་ཆབ་མདོ་གྲོང་ཁྱེར་གྱི་ནུས་རྒྱུ་གཙང་མའི་ཐོན་ལས་འཁོར་འབྲེལ་ཧྲིལ་པོའི་འཕེལ་རྒྱས་ལ་མཉམ་འདྲེས་ཧུར་ཐག་ཐུབ་པར་བྱ་རྒྱུ་ཡིན”ཞེས་བཤད།

ངོ་སྤྲོད་བྱས་པར་གཞིགས་ན། ཆབ་མདོའི་ཁུལ་གསར་བཙུགས་ནས་ལོ་10ཡི་རིང་། ཁེ་ལས་1500ཙམ་ནང་འདྲེན་བྱས་ནས་བོད་ལྗོངས་ཏུའོ་རུའེ་སྨན་རྫས་ཀུང་སི་དང་ཨེན་ཝུའེ་སྨན་དང་སྨན་རྫས་མ་རྐང་ཚད་ཡོད་ཀུང་སིའི་IPOཡི་ཁྲོམ་ཞུགས་སྨན་རྫས་ཀུང་སི་གཉིས་སྐྱེད་སྲིང་བྱས་པར་བརྟེན་ཆབ་མདོ་གྲོང་ཁྱེར་དུ་ཁྲོམ་ཞུགས་ཁེ་ལས་མེད་པའི་སྟོང་ཆ་བསྐངས་པ་དང་། ཆབ་མདོའི་ཅུན་ཆིན་ཞིང་ལས་ཚན་རྩལ་ཀུང་སིས་ལས་སྣོན་ཞིབ་ཚགས་བྱས་པའི་བཟའ་བཅའ་ནས་ཆག་ཁ་ན་ཏར་བདེ་བླག་ངང་ཕྱིར་གཏོང་བྱས་ནས་ཕྱི་རྒྱལ་གྱི་ཁྲོམ་ར་བཏོད་ཡོད། མིག་སྔའི་བར་གླིང་དུ་བཅའ་སྡོད་ཁེ་ལས་ཀྱིས་རིམ་རྩིས་བྱས་ན་གཏན་འཇགས་རྒྱུ་ནོར་མ་དངུལ་སྒོར་དུང་ཕྱུར་42.48བཏང་བ་དང་རིམ་རྩིས་བྱས་ན་མཛོད་འཇུག་ཁྲལ་བསྡུའི་ཡོང་འབབ་སྒོར་དུང་ཕྱུར་61ལས་བརྒལ་ཡོད།

གསར་གཏོད་ནུས་པ་ནི་ལྟེ་བའི་འགྲན་རྩོད་ནུས་པ་ཞིག་ཡིན་ལ། འཕེལ་རྒྱས་ལ་སྣེ་ཁྲིད་བྱེད་པའི་སྒུལ་ཤུགས་ཨང་དང་པོའང་ཡིན། ཆབ་མདོ་ཁུལ་གསར་གྱི་ཏང་གི་ལས་དོན་ཨུ་ལྷན་གྱི་ཧྲུའུ་ཅི་དང་དོ་དམ་ཨུ་ལྷན་གྱི་ཀྲུའུ་རེན་གཞོན་པ་སྒྲོལ་མ་ཆོས་སྐྱིད་ཀྱིས། ཉེ་བའི་ལོ་ཤས་རིང་ཆབ་མདོ་ཁུལ་གསར་གྱིས་བོད་ཀྱི་རྒྱལ་ཁབ་རིམ་པའི་ཚན་རྩལ་ཁེ་ལས་སྐྱོང་སྤེལ་ཁུལ་དང་པོ་སོགས“རྒྱལ་ཁབ”རིམ་པའི་གཉིས་གཏོད་སྤུས་རྟགས་5བཏོད་ཡོད། ཐོན་ལས་འཕེལ་རྒྱས་ཐད་ཆབ་མདོ་ཁུལ་གསར་གྱིས་གསར་གཏོད་ལས་སྟེགས་གཏོད་པར་གཞོལ་ནས་ཁེ་ལས་ཁེར་རྐྱང་གི་གསར་གཏོད་དེ་ཚོགས་སྤྱིའི་གསར་གཏོད་ཕྱོགས་སུ་འགྱུར་བར་སྐུལ་འདེད་གཏོང་བ་དང་གླིང་གི་དོན་དངོས་དང་ཟུང་འབྲེལ་དམ་ཟབ་བྱས་ནས་ཞིང་ལས་གསར་གཏོད་དང་། ཚན་རྩལ་གསར་གཏོད། སྨན་བཅོས་གསར་གཏོད། རིག་གནས་གསར་གཏོད་བཅས་ཀྱི“གཉིས་གཏོད”རྟེན་གཞི་ཆེན་པོ་གཞི་རྟེན་དུ་བྱེད་པ་དང་། སྐྱེ་དངོས་སྨན་རྫས་དང་། བདེ་ཐང་ཆེ་མོའི་ཐོན་ལས། ས་མཐོའི་ཁྱད་ལྡན་ཞིང་འབྲོག་ཐོན་རྫས་ཐོན་སྐྱེད་ལས་སྣོན་ལས་རིགས། ནུས་རྒྱུ་གཙང་མའི་སྒྲིག་ཆས་བཟོ་སྐྲུན་བཅས་གཙོ་ཁྲིད་ཐོན་ལས་ཆེན་པོ་གསུམ་ལ་དམིགས་ནས་ཚོང་འགུགས་བྱས་ཏེ་ཆབ་མདོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་གསར་པ་བསྣན་ཡོད།

“2018ལོར་ང་ཚོ་རང་སྐྱོང་ལྗོངས་རིམ་པའི་དཔལ་འབྱོར་གསར་སྤེལ་ཁུལ་དང་པོར་གྱུར་བ་དང་། 2020ལོར་སླར་ཡང་རང་སྐྱོང་ལྗོངས་རིམ་པའི་མཐོ་གསར་ལག་རྩལ་ཐོན་ལས་གསར་སྤེལ་ཁུལ་འཛུགས་རྒྱུའི་ཆོག་མཆན་ཐོབ་ནས་བོད་རང་སྐྱོང་ལྗོངས་ཀྱི་དམིགས་བསལ་དཔལ་འབྱོར་སྲིད་ཇུས་ཉིས་བརྩེགས་ལོངས་སྤྱོད་ཐུབ་པའི་ཁུལ་གསར་དང་པོར་གྱུར་ཡོད” སྒྲོལ་མ་ཆོས་སྐྱིད་ཀྱིས་སླད་ཕྱིན་ཆབ་མདོ་ཁུལ་གསར་གྱིས་ཚན་རྩལ་རྣམ་པའི་ཁེ་ལས་ནང་འདྲེན་དང་སྐྱེད་སྲིང་ཤུགས་ཆེན་བྱེད་པ་དང་། གླིང་གི་མཐོ་གསར་ལག་རྩལ་ཁེ་ལས་ཀྱི་བསྡུར་ཚད་མཐོ་རུ་གཏོང་བ། གླིང་གི་ཚན་རྩལ་གསར་གཏོད་འཕེལ་རྒྱས་ཐེབས་རྩ་འཛུགས་པ། ཁེ་ལས་དང་། ཚན་ཞིབ་སྒྲིག་གཞི། མཐོ་སློབ་བཅས་ཀྱིས་མཉམ་འབྲེལ་ཐོག་ཞིབ་འཇུག་གསར་སྤེལ་ལྟེ་གནས་དང་། ལག་རྩལ་ལྟེ་གནས། ཐོན་སྐྱེད་དང་སློབ་སྦྱོང་ཞིབ་འཇུག་བེད་སྤྱོད་བཅས་ཀྱི་མཉམ་ལས་རྩ་འཛུགས་མཉམ་སྐྲུན་ལ་ལྕག་སྐུལ་བྱེད་པ། གསར་གཏོད་ཞབས་ཞུའི་ལས་སྟེགས་འཛུགས་པ། ཚན་རྩལ་གྱི་གྲུབ་འབྲས་གཞན་སྒྱུར་ལ་རྒྱབ་སྐྱོར་བཅས་བྱས་ཏེ། མཐོ་གསར་ལག་རྩལ་ཐོན་ལས་ལ་བརྟེན་ནས་ཆབ་མདོའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རྒྱབ་སྐྱོར་བྱ་རྒྱུ་རེད་ཅེས་བཤད།