གོ་འཇོ་རྫོང་གིས་གྲོང་ཁྱེར་གྱི་ཁོར་ཡུག་ལེགས་བཅོས་བྱས་པ།

གསར་འགྱུར་སྤེལ་དུས། 　【2024-04-16 10:45:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉིན་ཤས་བསྟུད་མར། གོ་འཇོ་རྫོང་སྡོད་ཁང་འཛུགས་སྐྲུན་ཅུད་ཀྱིས་མི་སྣ་སྒྲིག་འཛུགས་བྱས་ཏེ་གྲོང་ཁུལ་གྱི་འགྲོ་ལམ་གཙོ་བོ་དང་ས་ཁོངས་གཙོ་བོ་དག་ཏུ་ཁོར་ཡུག་བཙོག་ཟིང་གི་རྣམ་པ་ལེགས་བཅོས་བྱས་པ་རེད།

ལེགས་བཅོས་བྱེད་པའི་སྐབས་སུ། རྫོང་སྡོད་ཁང་འཛུགས་སྐྲུན་ཅུད་ཀྱི་ལས་དོན་མི་སྣས་ལམ་རྒྱུད་ཀྱི་ཚོང་ཁང་རྣམས་ལ་ཞིབ་བཤེར་ཆད་ལུས་མེད་པར་བྱས་ཡོད་དེ། འགྲོ་ལམ་བཀག་ནས་ཁྲོམ་བཤམས་པ་དང་ལམ་ཁར་ཅ་ལག་བཞག་མཁན་དག་ལ་ལས་དོན་མི་སྣས་ངང་རྒྱུད་རིང་པོས་ཁ་ཏ་གོ་བསྐོན་དང་ཆབས་ཅིག་འབྲེལ་ཡོད་ཚོང་པ་དང་བདག་པོ་ཚོར་ལེགས་བཅོས་ཡོ་བསྲང་བྱེད་དགོས་པའི་བཀའ་རྒྱ་བཏང་ཡོད། དེ་བཞིན་རྫོང་སྡོད་ཁང་འཛུགས་སྐྲུན་ཅུད་ཀྱིས་ཁོར་ཡུག་གཙང་སྦྲ་བྱེད་མཁན་རྣམས་སྒྲིག་འཛུགས་བྱས་ཏེ། ཕུ་ལུང་དང་གཞིས་སྡོད་ཁུལ་ཆུང་སོགས་སྤྱི་པའི་ས་ཁོངས་ཀྱི་གྲུ་ཟུར་ཡོད་ཚད་གཙང་སྦྲ་ལེགས་པར་བྱས་ཐོག་འཚོ་བའི་གད་སྙིགས་མང་དག་ཅིག་དབོར་འདྲེན་བྱས་ནས་བཙོག་ཟིང་དྲི་ངན་གྱིས་སྦགས་པའི་ཁོར་ཡུག་གཙང་མར་བཟོས་ཡོད།

གཞན་ཡང་། འཛུགས་སྐྲུན་གྱི་གད་སྙིགས་གཙང་སེལ་བྱེད་ཐབས་ཚད་ལྡན་དུ་ཡོང་ཆེད། གོ་འཇོ་རྫོང་སྡོད་ཁང་འཛུགས་སྐྲུན་ཅུད་ཀྱིས་འཕྲུལ་འཁོར་ཆེ་གྲས་ཁ་ཅིག་མཐུན་སྦྱོར་བྱས་ཏེ། མར་ཆུའི་རྒྱུད་དུ་འཛུགས་སྐྲུན་གྱི་གད་སྙིགས་ཏུན20ཙམ་གཙང་སེལ་བྱས་པས། ཆུ་རྒྱུད་ཀྱི་ཁོར་ཡུག་ལེགས་སུ་ཕྱིན་ཞིང་དྭངས་བསིལ་གྱི་ཆུ་མོ་དང་སྔོ་ལྗང་གི་རི་བོ་སླར་གསོ་ཐུབ་ཡོད།