བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཡིག་གཟུགས་སློབ་གསོའི་དཔེ་སྟོན་རྟེན་གཞི”ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པར་སྒོ་བྱང་བཀལ་ནས་བཙུགས་པ།

གསར་འགྱུར་སྤེལ་དུས། 　【2024-06-21 09:00:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ6ཚེས18ཉིན་བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱིས་གཟུགས་འདས་ཡིག་གནས་ཀྱི་ཤུལ་བཞག་གལ་ཆེན་དུ་གྱུར་བའི་ཡིག་གཟུགས་སྒྱུ་རྩལ་གཞི་རིམ་དུ་སྤེལ་པའི་བྱེད་སྒོ་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པ་ནས་སྤེལ་བ་རེད།

སྒོ་བྱང་འགེལ་བའི་མཛད་སྒོའི་ཐོག་བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་འབྲེལ་ཡོད་འགོ་ཁྲིད་དང་། མཐུན་ཚོགས་ཀྱི་ཚོགས་མི། ཆབ་མདོ་གྲོང་ཁྱེར་རིག་རྩལ་ལྷན་ཚོགས་ཀྱི་འབྲེལ་ཡོད་འགོ་ཁྲིད་དེ་བཞིན་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་དགེ་སློབ་སོགས་བྱེད་སྒོར་ཞུགས་ཡོད།

བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་དྲུང་ཡིག་ཆེན་མོ་བས་བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཡིག་གཟུགས་སློབ་གསོའི་དཔེ་སྟོན་རྟེན་གཞི་ཡི་སྒོ་བྱང་འདི་ཉིད་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་ནང་དུ་འགེལ་བའི་དགོས་པ་དང་དམིགས་ཡུལ་དེ་བཞིན་ཆབ་མདོའི་མ་འོངས་པའི་ཡིག་གཟུགས་སྒྱུ་རྩལ་ཇི་ལྟར་འཕེལ་རྒྱས་གཏང་དགོས་པའི་ཐད་ཀྱི་བཀའ་སློབ་དང་བཅས་ཕྱོགས་བསྡོམས་གསུང་བཤད་གནང་བ་རེད།

ཐེངས་འདིའི་བྱེད་སྒོའི་གཙོ་སྐྱོང་མཁན་ནི་བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱི་ཚོགས་མི་ཆབ་མདོ་གྲོང་ཁྱེར་རིག་རྩལ་ལྷན་ཚོགས་ཡིག་གཟུགས་མཁས་པ་མཐུན་ཚོགས་ཀྱི་ཀྲུའུ་ཞི་གཞོན་པ་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པའི་སློབ་གཙོ་གཞོན་པ་འདན་ཚ་འཇམ་དབྱངས་ཆོས་དར་ཡིན་ལ། ཁོང་གིས་འགོ་ཚུགས་མཛད་སྒོའི་གསུང་བཤད་གནང་བ་མ་ཟད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡིག་གཟུགས་ནི་ཀྲུང་ཧྭའི་རིག་གནས་ཀྱི་ཁྱད་ནོར་ཡིན་ཞིང་། དེར་བློ་གྲོས་ཀྱི་དྭངས་མ་དང་། ཟུངས་སྟོབས་སོགས་མང་པོ་འདུས་ཡོད་པས། ངེས་པར་དུ་རྒྱུན་འཛིན་དང་དར་སྤེལ་གང་ལེགས་བྱེད་དགོས་གསུངས་པའི་དགོངས་དོན་བཞིན། ཀྲུང་ཧྭ་མི་རིགས་ཀྱི་སྲོལ་རྒྱུན་རིག་གནས་འདིའི་ཆེད་དུ་དཀའ་བ་བརྒྱ་དང་འབད་པ་སྟོང་གིས་འབྲས་བུ་དང་། ཆབ་མདོ་གྲོང་ཁྱེར་གྱི་དབུ་ཁྲིད་རྣམ་པས་རྒྱབ་སྐྱོར་འོག བོད་རང་སྐྱོང་ལྗོངས་ཡིག་གཟུགས་མཁས་པའི་མཐུན་ཚོགས་ཀྱིས་ཡིག་གཟུགས་སློབ་གསོའི་དཔེ་སྟོན་རྟེན་གཞི་འདི་འདྲ་བཙུགས་པ་ནི་ཏང་དང་རྒྱལ་ཁབ་ཀྱི་གོང་རིམ་འགོ་ཁྲིད་ཀྱི་ཐུགས་ཁུར་དང་རྒྱབ་སྐྱོར་མཚོན་ཡོད་པ་མ་ཟད། ང་ཚོ་ཚང་མས་ཡིག་གཟུགས་ལ་འབད་པ་བྱས་པའི་འབྲས་བུ་ཞིག་ཀྱང་འདུས་ཡོད་པར་གསུངས། གཏམ་བཤད་ཧྲིལ་པོས་མ་འོངས་ཀྱི་སློབ་སྦྱོང་ཁྲོད་སློབ་མ་རྣམ་པ་དང་ཡིག་མཁན་རྣམ་པས་སྲིད་ཇུས་ཀྱི་ཉི་འོད་ཁྲོད་མུ་འཐུད་ནས་ཡིག་གཟུགས་ཀྱི་སྦྱངས་བའི་ཐད་མཐུས་ཤོར་དང་ལྷོད་གཡེངས་མེད་པར་འབད་དགོས་པའི་སེམས་ཤུགས་སྐྱེད།

བོད་ལྗོངས་ཡིག་མཁས་མཐུན་ཚོགས་ཀྱི་ཡིག་གཟུགས་མཁས་དབང་རྣམས་དང་ཆབ་མདོ་གྲོང་ཁྱེར་གྱི་ཡིག་མཁན་རྣམས་ཀྱི་བར་ཕན་ཚུན་ཡིག་གཟུགས་སྒྱུ་རྩལ་གྱི་ཉམས་མྱོང་སྤེལ་རེས་བྱས་ནས་ཡུལ་དངོས་ནས་བོད་རྒྱ་གཉིས་ཀྱི་ཡིག་གཟུགས་འབྲི་རྩལ་ངོམས་ཤིང་མཐར་དྲན་རྟེན་འདྲ་པར་རྒྱབ་ནས་བཀྲ་ཤིས་དགའ་སྤྲོའི་ངང་མཇུག་ལེགས་པར་གྲུབ་པར་བྱས་ཡོད།