སློབ་གྲྭར་དྲིལ་བསྒྲགས་བྱས། འགོག་སྲུང་འཛིང་རགས་བསྐྲུན།

གསར་འགྱུར་སྤེལ་དུས། 　【2024-11-19 09:00:00】

པར་འདི་ནི་སློབ་གྲྭར་བྱེད་སྒོ་སྤེལ་བཞིན་པའི་གནས་ཚུལ་ཡིན་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར་ཆབ་མདོ་གྲོང་ཁྱེར་ནགས་ཚལ་མེ་ཟོན་ཉིང་ལག་རུ་ཁག་ཁ་རུབ་རུ་འབྲིང་གིས་ཆབ་མདོ་གྲོང་ཁྱེར་མཐོ་རིམ་སློབ་འབྲིང་གཉིས་པར“དམངས་ཡོངས་ཀྱིས་མེ་ཟོན་བྱེད། ཚེ་སྲོག་གོང་དུ་བཀུར”ཞེས་པའི་བརྗོད་དོན་གཙོ་བོའི“119”མེ་ཟོན་དྲིལ་བསྒྲགས་ཟླ་བའི་སློབ་གསོའི་དྲིལ་བསྒྲགས་བྱེད་སྒོ་སྤེལ་བ་རེད།

བྱེད་སྒོ་སྤེལ་ཡུལ་དུ་མེ་ཟོན་དྲིལ་བསྒྲགས་པས་མེ་སྐྱོན་ལ་ངོས་འཛིན་དང་། མེ་སྐྱོན་ཐག་གཅོད། ཤེས་བྱ་སྦྱོང་བ། རང་ངོས་སྲུང་སྐྱོབ་བཅས་ཕྱོགས་བཞི་ནས་སློབ་གྲྭའི་རྒྱུན་གཏན་འཚོ་བའི་ཁྲོད་ཁོང་དུ་ཆུད་དགོས་པའི་མེ་ཟོན་བདེ་འཇགས་ཀྱི་ཤེས་བྱ་དང་། དེ་བཞིན་མེ་སྐྱོན་ཐོན་མ་ཐག་ཇི་ལྟར་གསོད་པ་དང་ཉེན་ཁ་ལས་ཐར་ཐབས་དང་རང་སྐྱོབ་ཇི་ལྟར་བྱེད་པ་སོགས་ཀྱི་རྒྱུན་ཤེས་འགྲེལ་བཤད་ཞིབ་ཕྲ་བརྒྱབ་ནས་དགེ་རྒན་དང་ལས་བཟོ་ཡོངས་ལ་གསོན་ཉམས་ལྡན་པའི་མེ་ཟོན་སློབ་ཚན་ཞིག་འཚོགས་པ་རེད།

ད་ཐེངས་ཀྱི་བྱེད་སྒོ་སྤེལ་དོན་ནི“སློབ་མ་གཅིག་ལ་སློབ་གསོ་རྒྱག་པ་དང་། ཁྱིམ་ཚང་གཅིག་ལ་སྐུལ་ཁྲིད་བྱེད་པ། སྤྱི་ཚོགས་ཡོངས་ལ་ཁྱབ་པ”བཅས་ཀྱི་ཕན་འབྲས་བཟང་པོ་དང་དོན་དངོས་ཀྱི་དམིགས་ཡུལ་སྒྲུབ་ཆེད་ཡིན་ཞིང་། དུས་བདེའི་སློབ་གྲྭ་གཏོད་རྒྱུར་སྐུལ་འདེད་གཏོང་ཆེད་མེ་ཟོན་གྱི་སྟོབས་ཤུགས་ལེགས་སྐྱེས་འབུལ་རྒྱུ་རེད།