སྦྱངས་པའི་ལག་རྩལ་ཡོང་འབབ་བྱུང་། ཁོ་ཚོའི་གདོང་ལ་འཛུམ་མདངས་མངོན།

གསར་འགྱུར་སྤེལ་དུས། 　【2024-12-10 09:00:00】

རས་གཞི་ཉོ་མཁན་གྱིས་ཡུལ་དངོས་སུ་དངུལ་སྤྲད་བཞིན་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ12པའི་ཚེས3ཉིན་ཐང་གའི་རས་གཞི་བཟོ་བའི་གསབ་སྦྱོང་གི་མཇུག་འགྲིལ་མཛད་སྒོ་དེ་ཁ་རུབ་ཆུས་ཀརྨ་ཤང་ཀརྨ་གྲོང་ཚོའི་དམངས་ལ་སྟབས་བདེ་སྤྲོད་པའི་ཞབས་ཞུ་ལྟེ་གནས་སུ་གཉེར་བ་དང་། ཉེ་འཁོར་གྱི་གྲོང་ཚོ་ནས་ཡོང་བའི་བུད་མེད35ཡིས་ལུས་ལ་གཟབ་མཆོར་སྤྲས་ཏེ་སྔ་མོ་ནས་མཇུག་འགྲིལ་མཛད་སྒོ་འགོ་བརྩམས་པར་རེ་སྒུག་བྱས་ཡོད། ཟླ་ཕྱེད་ལྷག་གི་གསབ་སྦྱོང་བྱས་པ་བརྒྱུད། ཁོ་ཚོས་ཐོག་མར་རས་གཞི་བཟོ་ཤེས་པ་ཞིག་ནས་བཟོ་བོ་མཁས་པ་ཞིག་ཏུ་གྱུར་ཏེ་ལག་རྩལ་ལ་བརྟེན་ནས་ཕྱུག་འགྱུར་ལམ་བུའི་ཐོག་གི་གསེར་ཟོམ་དང་པོ་བླངས་པ་རེད།

ཤེས་རྟོགས་བྱུང་བར་གཞིགས་ན། ཐེངས་འདིའི་གསབ་སྦྱོང་ནི་ཆབ་མདོ་གྲོང་ཁྱེར་བུད་མེད་མཉམ་འབྲེལ་ལྷན་ཚོགས་དང་ཁ་རུབ་ཆུས་ཀརྨ་ཤང་མཉམ་འབྲེལ་ཐོག་གཙོ་གཉེར་བྱས་པ་ཞིག་ཡིན་ཞིང་། དེའི་དམིགས་ཡུལ་ནི་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་ཞི་ཅིན་ཕིང་གི་རིག་གནས་དགོངས་པ་ལག་བསྟར་དོན་འཁྱོལ་དང་། གྲོང་ཨུད་ཀྱི“22445”ཡི་སྤྱིའི་ལས་ཀའི་བསམ་ཕྱོགས་ལག་བསྟར་དོན་འཁྱོལ་བཅས་བྱས་ཏེ། གཞི་རིམ་གྱི་འཐབ་ས་དང་པོའི་དཀའ་ངལ་ཡོད་པའི་བུད་མེད་ཀྱི་ཡོང་འབབ་འཕར་ནས་ཕྱུག་འགྱུར་ལམ་དུ་བསྐྱོད་པར་ཁྲིད་སྟོན་དང་སྐུལ་སྤེལ་གཏོང་རྒྱུ་དེ་རེད།

ཉིན་དེར། སློབ་མཇུག་སྒྲིལ་བའི་མཛད་སྒོ་འཚོགས་རྗེས། གཙོ་སྒྲུབ་ཕྱོགས་ཀྱིས་གདན་ཞུ་བྱས་པའི་འབྲེལ་ཡོད་ཁེ་ལས་ཀྱིས་སློབ་མ་དག་གིས་བཟོས་པའི་རས་གཞི103གཅིག་སྡུད་ཐོག་བསྡུ་ཉོ་བྱས་པ་དང་།

རིམ་རྩིས་བྱས་ན་མ་དངུལ་སྒོར8390ཟིན་ཡོད།

བོད་ཀྱི་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པའི་ཐང་ག་ལ་ཕུན་སུམ་ཚོགས་པའི་སྒྱུ་རྩལ་གྱི་ནང་དོན་དང་བླ་ན་མེད་པའི་རིག་གནས་ཀྱི་རིན་ཐང་ཆེས་ཆེར་ལྡན་པས། འབྲེལ་ཡོད་ཐོན་རྫས་ལ་འཛད་སྤྱོད་པས་དགའ་བསུ་ཆེན་པོ་བྱེད་ཀྱིན་ཡོད།

ངོ་སྤྲོད་བྱས་པར་གཞིགས་ན། ཐང་གའི་རས་གཞི་བཟོ་བ་ནི་ཐང་ག་འབྲི་བའི་གོ་རིམ་དང་པོ་དེ་ཡིན། མིག་སྔར་ཁྲོམ་རའི་ཐོག་གི་ཐང་གའི་རས་གཞི་མང་ཤོས་ཐང་གའི་དགེ་རྒན་གྱིས་བཟོ་གྱིན་ཡོད།

ཐེངས་འདིའི་རས་གཞི་བཟོ་བའི་མཛུབ་སྟོན་དགེ་རྒན་ནི་ཀརྨ་རྣམ་རྒྱལ་ཡིན་ཞིང་། ཐང་གའི་རས་གཞི་བཟོས་ནས་མི་ལོ30ལྷག་འགོར་ཟིན། ཁོང་གིས་གསར་འགོད་པར་རས་གཞི་བཟོ་བའི་བརྒྱུད་རིམ་མདོར་བསྡུས་ངོ་སྤྲོད་བྱས་ཡོད་དེ། ཤིང་བལ་དག་མ་ལས་བཏགས་ཤིང་རྫས་འགྱུར་གྱི་བལ་མི་འདྲེས་པའི་རས་ཀྱིས་འོས་ལ། དེ་ལ་ཐོག་མར་ཐང་ཀ་ཆེ་ཆུང་གང་འདོད་པའི་ཚད་དང་མཐུན་པ་དྲས་ཏེ་སྣོད་གཙང་མའི་ནང་དུ་ལེགས་པར་བཀྲུས་ནས་སྐམ་དུ་བཅུག དེ་ལྟར་མ་གྲུབ་ན། ཐོག་མར་སྐུད་པ་ཤེད་ཅན་གྱིས་ཁབ་ཚིགས་མཛུབ་གུ་ཐར་ཙམ་གྱི་རྒྱང་ཕྲན་ལ་དྲངས། དར་སྐུད་སོགས་སྲོག་སྲ་ཞིང་སྤུ་ལོག་མི་འབྱུང་བའི་ཐག་པ་ཕྲ་མོས་རྒྱོང་ཤིང་ལ་དྲང་བར། འདྲེན་ཞོར་དང་མཐེ་བོས་འཐེན་ཞོར་གྱིས་མཐའ་ནས་བསྐོར་ཞིང་ཟུར་བཞི་ནས་མ་ཤོར་ལ། གྲུ་ཡོ་སོག་ཀ་མེད་པར་བརྒྱངས་ནས། ངོས་འཇམ་པོར་འབྱུང་ཐབས་སུ་ཡང་བསྐྱར་བཞར་གྲི་རྣོན་པོས་རི་མོ་འབྲི་བའི་ངོས་ཀྱི་རས་ཤ་བཅད་མཐར་ཆུ་དྭངས་མས་ཆ་སྙོམས་པར་བྱུགས་ཏེ་ཐང་ཤ་ཆོད་ངོས་སུ་ཡང་བསྐྱར་བརྒྱངས་ནས་སྐམ་དུ་བཅུག དེ་ནས་སྤྱིན་ཆུ་གར་སླ་མཛུབ་གུས་བཙིར་ན་འབྱར་སྣང་ཙམ་འབྱུང་བའི་ཚད་ཅན་གྱིས་ལན་གཅིག་བྱུགས་ནས་ཡང་མཐེ་མོས་མཐའ་ནས་བསྐོར་ཏེ་བསྡོམ། བསྐམས་མཐར་ས་དཀར་གར་སླ་རན་པའི་ཆུས་ལན་གཉིས་བྱུགས་པའི་མིང་ལ་དཀར་གཞིའམ་དཀར་གདན་ཞེས་ཏེ། མདུན་ངོས་སུ་ཐེངས་གསུམ་དང་རྒྱབ་ངོས་སུ་ཐེངས་གཉིས་ཙམ་སྙོམས་པར་བྱུགས། དཀར་ཞད་ཆེ་ན་ཚོན་གྱིས་ནོན་དཀའ་ཞིང་ནག་ཆེ་ན་ཚོན་ཁ་མི་གསལ་བས་དཀར་ཚད་རན་པ་དང་།དམ་ཆེ་ན་གད་ཉེན་དང་།ཆུང་ན་ཚོན་གོག་པ་ཡིན་པས་དམ་ཚོད་ཟིན་པ་དང་།དཀར་གཞི་སྲབ་མཐུག་གི་ཚད་གནམ་གྱི་སྐར་མ་ཙག་ཙིག་ཙམ་ཟེར་བས། རས་གཞིའི་རྒྱབ་ནས་མཁའ་ལ་བལྟས་ན་ནམ་མཁའ་གཡའ་དྭངས་པའི་དགོང་ཀའི་སྐར་མ་ཇི་བཞིན་དུ་མཐོང་བ་ནི་ཚད་དུ་བཤད་དེ། དེ་ལ་དབུར་རྡོ་རྩུབ་ཞད་ཅན་གྱིས་སྲ་ཤིང་གི་ཤིང་ལེབ་ངོས་སྙོམས་ཤིང་འཇམ་པའམ་ཡང་ན་ཤེལ་མཐུག་གི་དབུར་གདན་སྟེང་དུ་རློན་དབུར་ཐེངས་གཉིས་ནས་གསུམ་གྱི་བར་དུ་བྱས་ཤིང་སྐམ་མཐར་སྐམ་དབུར་ལན་བཞི་ལྔ་ཙམ་གྱིས་དབུར་མཇུག་བཅད་ལ། རློན་དབུར་གྱིས་རས་སྙིང་དང་ས་སྙིགས་ཐུལ་ཞིང་། སྐམ་དབུར་གྱིས་ངོས་འཇམ་ཞིང་འོད་དང་ལྡན་པར་བྱེད་དོ།།

ད་ཐེངས་ཀྱི་གསབ་སྦྱོང་རས་གཞི་བརྩམས་ཆོས་དཔྱད་འདེམས་ནང་བྱ་དགའ་ཨང་དང་པོ་ཐོབ་པའི་ཤེས་རབ་གཡུ་སྒྲོན་གྱིས་གསར་འགོད་པར། ཟླ་ཕྱེད་རིང་དགེ་རྒན་གྱི་མཛུབ་ཁྲིད་འོག་ངས་རས་འདེམས་པ་དང་། སྒྲོམ་བཟོ་བ། སྦྱིན་ཆུ་བྱུགས་པ། བརྡར་རྒྱག་པ་བཅས་ཀྱི་རྩལ་ནུས་ཁོང་དུ་ཆུད་པ་མ་ཟད། འཚོ་བའི་ཡིད་ཆེས་སྔར་བས་ཆེ་རུ་ཕྱིན་ཡོད། བཟོ་རྩལ་རྒྱུན་ཆད་མེད་པར་བྱང་ཆུབ་པར་གྱུར་པ་དང་བསྟུན་ནས་ཁྲོམ་རས་ཁས་ལེན་བྱེད་པའི་ཐང་གའི་རས་གཞི་སྔར་བས་མང་པོ་གཏོད་ཐུབ་ངེས་ཡིན་པ་དང་ལག་རྩལ་སྣ་གཅིག་ལ་བརྟེན་ནས་ཁྱིམ་མིའི་འཚོ་བའི་ཆུ་ཚད་མཐོ་རུ་གཏོང་ཐུབ་ངེས་ཡིན་པའི་ཡིད་ཆེས་ཡོད་ཅེས་བཤད།