ཀྲོང་ཅིན་སུང་གིས་ཝུའུ་ཁྲེང་དང་བཞུགས་མོལ་གནང་བ།

གསར་འགྱུར་སྤེལ་དུས། 　【2024-12-20 09:00:00】

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ12ཚེས16ཉིན་གྱི་ཕྱི་དྲོར། གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་གིས་གོ་ཁྲེང་མ་རྐང་ཚོད་འཛིན་ཚོགས་པའི་ཏུང་ཧྲི་ཀྲང་ཝུའུ་ཁྲེང་དང་བཅས་པར་བཞུགས་མོལ་གནང་ནས་གོ་ཁྲེང་ཚོགས་པ་ཆབ་མདོར་ངོ་འཕྲད་གྲོས་མོལ་དང་མཉམ་ལས་ཕེབས་པར་དགའ་བསུ་ཞུས་པ་རེད།

ཀྲོང་ཅིན་སུང་གིས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་མཇུག་འགྲིལ་མ་ཐག་པའི་མཚམས་འདིར་ཏུང་ཧྲི་ཀྲང་ཝུའུ་ཁྲེང་གིས་རུ་སྣེ་ཁྲིད་དེ་ཆབ་མདོར་འཚམས་འདྲི་གནང་བ་དེས་གོ་ཁྲེང་ཚོགས་པའི“གསར་བརྗེས་ཁྲིད་སྟོན་དང་འབྱུང་འཕྲོད་འཕེལ་རྒྱས”ཀྱི་གཉེར་སྐྱོང་འདུ་ཤེས་དང་ཕྱོགས་གཉིས་པོའི་མཉམ་ལས་ཀྱི་མདུན་ལམ་ལ་ཚད་མཐོའི་མཐོང་ཆེན་གནང་བ་གང་ལེགས་མཚོན་ཡོད། ཁོང་གིས་གྲོང་ཨུད་དང་གྲོང་ཁྱེར་སྲིད་གཞུང་གི་ཚབ་ཞུས་ནས་ཝུའུ་ཁྲེང་སོགས་ཆབ་མདོར་རྟོག་ཞིབ་ཕེབས་པར་སྤྲོ་སེམས་འཁོལ་བའི་ངང་དགའ་བསུ་ཞུས་པ་དང་ཆབ་མདོའི་ཆགས་ཡུལ་གྱི་ལེགས་ཆ་དང་སྲིད་ཇུས་ཀྱི་ལེགས་ཆ། རིག་གནས་ཀྱི་ལེགས་ཆ། འཕེལ་རྒྱས་ཀྱི་བཀོད་པ་སོགས་ངོ་སྤྲོད་མདོར་བསྡུས་གནང་ཡོད།

ཀྲོང་ཅིན་སུང་གིས་ཆབ་མདོ་ནི་རང་སྐྱོང་ལྗོངས་ཏང་ཨུད་ཀྱིས་ལྟེ་བའི་ཡན་ལག་གྲོང་ཁྱེར་འཛུགས་སྐྲུན་བྱ་རྒྱུར་གཏན་འཁེལ་བཟོས་ཡོད་ལ། ཆབ་མདོ་འདི་ཉིད་ས་ཁོངས་མཐུན་སྦྱོར་འཕེལ་རྒྱས་ལ་སྣེ་ཁྲིད་པའི་བོད་ཤར་གྱི་ལྟེ་བའི་ཡན་ལག་གྲོང་ཁྱེར་དང་ལྟེ་བའི་འཕར་སྣེ་ཞིག་ཏུ་གཏོད་པ་དང་། བོད་འདི་ཉིད་མཐའ་འཁོར་གྱི་དཔལ་འབྱོར་ཁུལ་ནང་ཞུགས་པའི་ལྷུ་ཚིགས་གལ་ཆེན་གྱི་གྲོང་ཁྱེར་དང་སྒོ་དབྱེའི་ལྟེ་བ་གལ་ཆེན་ཞིག་ཏུ་གཏོད་བཞིན་ཡོད་པས། འཕེལ་རྒྱས་ཀྱི་མདུན་ལྗོངས་ཡངས་ཤིང་ཆེ་ལ་གོ་སྐབས་སྔར་བྱུང་མྱོང་མེད་པ་ཞིག་ཡིན། མིག་སྔར་གྲོང་ཁྱེར་ཡོངས་ཀྱི་གོང་འོག་ཚང་མས“22445”སྤྱིའི་ལས་ཀའི་བསམ་ཕྱོགས་ལ་དམིགས་ཏེ།“ཚང་དགོས་པ་གསུམ་དང་ཕན་འདོགས་པ་གཅིག”གི་སྤྱིའི་བླང་བྱ་དོན་འཁྱོལ་བྱེད་བཞིན་ཡོད་པ་དང་།“ཐམས་ཅད་ཁ་ཤར་ཕྱོགས་སུ་གཏད་དེ་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྣེ་ཁྲིད་དཔེ་སྟོན་གྲོང་ཁྱེར་ཞིག་བསྐྲུན་རྒྱུའི”ལས་ཀའི་དམིགས་ཚད་ལ་དམ་པོར་དམིགས་ནས“3＋1＋1”འཕེལ་རྒྱས་ཀྱི་ལས་འགན་གལ་ཆེན་ལ་སྐུལ་འདེད་བཏང་བས་ཚོང་གཉེར་ཁོར་ཡུག་རྒྱུན་མཐུད་ལེགས་གཏོང་དང་སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་སོང་ཡོད་ཅེས་གསུངས།

ཀྲོང་ཅིན་སུང་གིས་ཆབ་མདོར་གསེར་དངུལ་ཟངས་ལྕགས་སོགས་གཏེར་རིགས་བརྒྱ་ལ་ཉེ་བ་ཡོད་པ་དང་། མདོག་ལྡན་ལྕགས་རིགས་གཏེར་ཁའི་ལེགས་ཆ་མངོན་གསལ་དོད་པོ་ཡོད། ད་ལྟའི་ཆབ་མདོས་འཕེལ་རྒྱས་ཀྱི་རྣམ་པ་གསར་པའི་ནང་ཧུར་ཐག་ཞུགས་པ་དང་རང་འགུལ་ངང་རྒྱལ་ཁབ་ཀྱི“ཐཱན་གཉིས”ཀྱི་འཐབ་ཇུས་ལ་ཞབས་འདེགས་ཞུ་བ། འབྱུང་འཕྲོད་ཐཱན་ཉུང་ཐོན་ལས་འཕེལ་རྒྱས་ཤུགས་ཆེན་གཏོང་བ། བོད་ཤར་དང་གཙང་གསུམ་སོགས་ཀྱི་གཏེར་ཁ་གཙོ་བོར་དམིགས་ཏེ་ས་གཤིས་བརྟག་ཞིབ་བྱེད་པ་དང་གཏེར་འཚོལ་ལས་དོན་ལ་སྐུལ་འདེད་ཏན་ཏིག་གཏོང་བ། གཏེར་རྫས་རྩད་ཞིབ་དང་གསར་སྤེལ་གྱི་འཕར་གཞི་གསར་པ་ཧུར་ཐག་གཏོད་པ་བཅས་བྱས་ཡོད་པས། གོ་ཁྲེང་ཚོགས་པ་ནི་རྒྱལ་ནང་གི་སྔོན་ཐོན་ཅན་དང་རྒྱལ་སྤྱིར་སྐད་གྲགས་ཡོད་པའི་འབྱུང་འཕྲོད་གྲངས་འཛིན་ཅན་དང་འབྱུང་འཕྲོད་གཏེར་ལས། ནུས་རྒྱུ་གསར་པའི་ཁེ་ལས་ཡིན་པས་ཕྱོགས་གཉིས་པོས་མཉམ་ལས་དང་ཐབས་ལམ་གང་མགྱོགས་ཁ་གསལ་བཟོས་ནས་གོ་ཁྲེང་ཚོགས་པས་མ་དངུལ་དང་ལག་རྩལ། ཁྲོམ་ར་སོགས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་རིག་ནུས་སྔོག་འདོན་དང་གཏེར་རི། ཕྱོགས་བསྡུས་བེད་སྤྱོད་སོགས་ཐད་ཀྱི་ལེགས་ཆ་འདོན་སྤེལ་གང་ལེགས་བྱེད་དགོས་ཅེས་བསྟན།

ཝུའུ་ཁྲེང་གིས་གོ་ཁྲེང་ཚོགས་པའི་ལྟེ་བའི་ལས་སྒོ་དང་ཐོན་ལས་ཁྱབ་ཚུལ། འཕེལ་རྒྱས་ཀྱི་འདུན་པ་བཅས་ངོ་སྤྲོད་གནང་ཞིང་། ཁོང་གིས་གོ་ཁྲེང་ཚོགས་པ་བཙུགས་ནས་ད་བར་ཐོག་མཐའ་བར་གསུམ་དུ“ཕྱོགས་གཅིག་གི་ཐོན་ཁུངས་གསར་སྦོལ་བྱས་ནས་ཕྱོགས་གཅིག་གི་རི་ཆུ་སྲུང་སྐྱོབ་བྱ་རྒྱུ། ཕྱོགས་གཅིག་གི་དཔལ་འབྱོར་འཕེལ་རྒྱས་བཏང་ནས་ཕྱོགས་གཅིག་གི་མི་སེར་ཕྱུག་པོར་ཆགས་པ་བྱ་རྒྱུའི”ཐོག་མའི་བསམ་འདུན་དང་འགན་འཁྲི་བློ་ལ་བརྟན་པོར་བཅངས་ནས་སྐྱེ་ཁམས་ཁོར་ཡུག་སྲུང་སྐྱོང་དང་། ཐོན་ཁུངས་ལུགས་མཐུན་བཀོལ་སྤྱོད། ནུས་བསྲི་སྙིགས་འཕྲི། གཏེར་ཁུལ་ཞི་མཐུན་བཅས་གཞི་རྩའི་དམིགས་ཚད་དུ་བཟུང་རྒྱུར་མཐའ་འཁྱོངས་བྱས་པ་དང་། གོ་ཁྲེང་ཚོགས་པས་ཆབ་མདོའི་འབྱུང་འཕྲོད་གཏེར་ལས་དང་འབྱུང་འཕྲོད་ཐོན་ལས་གསར་སྤེལ། རིག་ནུས་ཅན་དུ་རིམ་སྤོར་སོགས་ཁྲོམ་རའི་དགོས་མཁོ་སྐོང་ཆེད་སྟོབས་ཤུགས་སྐྱེས་སུ་འབུལ་འདོད་ཡོད་ཅེས་བཤད།