ཀྲོང་ཅིན་སུང་གིས་ས་ཁུལ་དང་གྲོང་ཁྱེར་རིམ་པའི་འགོ་ཁྲིད་ལས་བྱེད་དག་གི་སྣེ་ཁྲིད་དེ་ཆབ་མདོ་གྲོང་ཁྱེར་གྱི་སྲིད་གཙང་ཉེན་ཟོན་སློབ་གསོའི་འགྲེམ་སྟོན་ལ་གཟིགས་སྐོར་གནང་བ།

གསར་འགྱུར་སྤེལ་དུས། 　【2024-12-20 09:00:00】

ཟླ12ཚེས18ཉིན་གྱི་ཕྱི་དྲོར། གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་གིས་ས་ཁུལ་དང་གྲོང་ཁྱེར་རིམ་པའི་འགོ་ཁྲིད་ལས་བྱེད་དག་གི་སྣེ་ཁྲིད་དེ་ཆབ་མདོ་གྲོང་ཁྱེར་གྱི་སྲིད་གཙང་ཉེན་ཟོན་སློབ་གསོའི་འགྲེམ་སྟོན་ལ་གཟིགས་སྐོར་གནང་བ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ12ཚེས18ཉིན་གྱི་ཕྱི་དྲོར། གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་གིས་ས་ཁུལ་དང་གྲོང་ཁྱེར་རིམ་པའི་འགོ་ཁྲིད་ལས་བྱེད་དག་གི་སྣེ་ཁྲིད་དེ་ཆབ་མདོ་གྲོང་ཁྱེར་གྱི་སྲིད་གཙང་སློབ་གསོའི་རྟེན་གཞིར་ཕེབས་ནས་སྲིད་གཙང་ཉེན་ཟོན་སློབ་གསོའི་འགྲེམ་སྟོན་ལ་གཟིགས་སྐོར་གནང་ཡོད།

ལའོ་ཆིན་འུའུ་དང་། ཝང་ཡ་ཏུང་། ཀྲང་ཅན་ཧྭ། ཆི་དབྱིན་ཧའེ། རྡོ་རྗེ་དགྲ་འདུལ། ཀྲང་ཝུན་ཧྲན། དངོས་གྲུབ་ཟླ་བ། ཀྲའོ་པིན། ཝུའུ་དབྱིང་ཧུའེ། ཝང་ཧྲི་ཡུས། ཅཱ་ཤིན་ཡུས། ཏེང་ཝུན་ཁྲང་བཅས་ཞུགས་ཡོད། ལས་དོན་མི་སྣའི་ཁྲིད་སྟོན་འོག་ཀྲོང་ཅིན་སུང་སོགས་འགོ་ཁྲིད་ཀྱིས་འགྲེམ་སྟོན་ཚན་པ་ཁག་ལ་རེ་རེ་བཞིན་གཟིགས་སྐོར་གནང་བ་དང་སྲིད་གཙང་སློབ་གསོའི་རྟེན་གཞིའི་གནས་ཚུལ་ངོ་སྤྲོད་ནན་ཏན་ངང་གསན་པར་མ་ཟད་དཔེ་མཚོན་གྱོད་དཔེ་འགྲེམ་སྟོན་དང་ཡི་གེ་སོགས་ལ་ཞིབ་ཕྲ་གཟིགས་པ་རེད།

ཀྲོང་ཅིན་སུང་གིས་སྲིད་གཙང་སློབ་གསོའི་རྟེན་གཞི་ནི་ཏང་ཡོན་ལས་བྱེད་པས་ཡུལ་དངོས་ནས་ཏང་གཤིས་དང་ཏང་སྲོལ། ཏང་གི་སྒྲིག་ཁྲིམས་བཅས་ཀྱི་སློབ་གསོ་དང་ལེན་བྱེད་སའི་སློབ་ཁང་དཔེ་གསོན་པོ་ཞིག་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཆབ་སྲིད་ཀྱི་བློ་སྟོབས་དང་འཁུར་སེམས་ཆེར་སྐྱེད་ཀྱི་ཐོག་ནས་ཏང་ཡོངས་ཀྱི་སྣེ་ཁྲིད་དེ་བློ་བརྟན་འགྱུར་མེད་ངང་ཕྱོགས་ཡོངས་ནས་ཏང་ནན་པོས་སྐྱོང་བའི་རླབས་ཆེན་ལག་ལེན་ལ་སྐུལ་འདེད་བཏང་བས་ཏང་གི་རང་ངོས་གསར་བརྗེའི་སྐོར་གྱི་སྤྱི་ཁྱབ་ཧྲུའུ་ཅིའི་ཞི་ཅིན་ཕིང་གི་དགོངས་པ་གལ་ཆེན་ཆགས་པ་དང་གུང་ཁྲན་ཏང་གི་སྲིད་སྐྱོང་ཆོས་ཉིད་དང་ཏང་འཛུགས་སྐྱོང་གི་ཆོས་ཉིད་ལ་ངོས་འཛིན་ཇེ་ཟབ་ཏུ་ཕྱིན་ནས། ང་ཚོར་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ངོ་རྒོལ་ལས་དོན་ཡག་པོ་བསྒྲུབ་རྒྱུར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད་པས། གྲོང་ཁྱེར་ཡོངས་ཀྱི་རིམ་པ་སྡེ་ཚན་ཁག་དང་རྒྱ་ཆེའི་ཏང་ཡོན་ལས་བྱེད་པ་ཚོས“གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་བྱེད་དགོས་ཤིང་།“འདུ་ཤེས་བཞི”ཟབ་ཏུ་གཏོང་བ་དང“གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་བྱས་ནས། ཕྱོགས་ཡོངས་ནས་ཏང་ནན་པོས་སྐྱོང་རྒྱུ་འཕེལ་རྒྱས་ཇེ་ཟབ་འགྲོ་རྒྱུར་སྐུལ་འདེད་བཏང་སྟེ། ཆབ་མདོ་འདི་ཉིད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྣེ་ཁྲིད་དཔེ་སྟོན་གྲོང་ཁྱེར་ཞིག་ཏུ་འཛུགས་སྐྲུན་བྱ་ཆེད་སྤྱོད་བཟང་གཞུང་དྲང་གི་ཆབ་སྲིད་ཁོར་ཡུག་དང་ལས་སྒྲུབ་ལས་གཏོད་ཀྱི་རྣམ་པ་བཟང་པོ་ཞིག་གཏོད་དགོས་ཞེས་བསྟན།

ཀྲོང་ཅིན་སུང་གིས་ང་ཚོས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་རྒྱུན་འཁྱོངས་བྱས་ཏེ། མང་ཚོགས་ཀྱི་བདེ་རྩར་ཐུག་པའི་ཁེ་ཕན་སྲུང་སྐྱོང་མཐའ་གཅིག་ཏུ་བྱེད་དགོས་ལ། དངོས་སྒྲུབ་དངོས་གཉེར་གྱི་ཐོག་ནས་ཏང་ཡོན་ལས་བྱེད་དཔུང་ཁག་གི་སྣང་བརྙན་བཟང་པོ་མངོན་པར་བྱེད་དགོས་ཤིང་། སྐོར་ཞིབ་དང་སྐོར་དཔྱོད་ཀྱི་ནུས་པ་འདོན་སྤེལ་གང་ལེགས་བྱས་ནས།“ཐར་པར་གཏན་ནས་མི་གཏོང་བའི”རྣམ་འགྱུར་ཐོག་ནས་རུལ་སུངས་དང་འགན་འཛོལ་ཤོར་བའི་བྱེད་སྤྱོད་ལ་ཆད་པ་ནན་པོ་གཅོད་དགོས་ཤིང་། རུལ་སུངས་མི་ཕོད་པ་དང་རུལ་སུངས་མི་རུང་བ། རུལ་སུངས་མི་འདོད་པ་བཅས་མཉམ་དུ་སྐུལ་འདེད་བཏང་ནས། གྱོད་དོན་ཞིབ་གཅོད་ལ་ལྟ་སྐུལ་བྱེད་པའི་གྲུབ་འབྲས་བེད་སྤྱོད་གང་ལེགས་བྱས་ཏེ། གྱོད་དོན་ལ་བརྟེན་ནས་བསྒྱུར་བཅོས་ལ་སྐུལ་འདེད་དང་གྱོད་དོན་ལ་བརྟེན་ནས་བཅོས་སྐྱོང་ལ་སྐུལ་འདེད་གཏོང་བ་དང་། ཏང་ཡོན་ལས་བྱེད་པར་ཁྲིད་སྟོན་བྱས་ནས་གྱོད་དོན་དཔེ་མཚོན་ཆེ་ཆུང་ཐམས་ཅད་ལས་བསླབ་བྱ་ཟབ་མོ་ལེན་ཏེ། རང་སྐྱོན་རང་བརྟག་དང་དཔེ་བཞག་རིགས་འགྲེའི་སྒོ་ནས་སྔ་ཙམ་ནས་རྐྱེན་རྩ་ཆུང་ཟློག་བྱེད་དགོས་ཞེས་ནན་བཤད་གནང་ཡོད། ཀྲོང་ཅིན་སུང་གིས་གིས་སྒྲིག་བཤེར་ལྟ་ཞིབ་དང་ཁྲིམས་འཛིན་སྡེ་ཚན་གྱིས་དབང་ཆའི་ལྟ་སྐུལ་ལམ་ལུགས་དང་སྒྲིག་ཁྲིམས་ལག་བསྟར་དང་ཁྲིམས་འཛིན་མ་ལག་སྔར་བས་འཐུས་ཚང་དུ་བཏང་ནས་ཕྱོགས་ཡོངས་ནས་ཏང་ནན་པོས་སྐྱོང་རྒྱུ་དེ་ལམ་ལུགས་ཅན་དང་ཚད་ལྡན་ཅན་དུ་འགྱུར་རྒྱུར་སྐུལ་འདེད་གཏོང་དགོས་ཤིང་། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཆབ་མདོས་ཕྱོགས་ཡོངས་ནས་ཏང་ནན་པོས་སྐྱོང་བར་སྐུལ་འདེད་གཏོང་བའི་ཉམས་མྱོང་དང་བྱེད་ཐབས་ལ་ཁྱོན་ཡོངས་ནས་ཕྱོགས་བསྡོམས་ནན་ཏན་བྱས་ཏེ་ཕན་ཡོད་ཀྱི་ཉམས་མྱོང་དང་ནུས་ལྡན་གྱི་བྱེད་ཐབས་དེ་ལམ་ལུགས་དང་ལམ་སྲོལ་གྱི་རྣམ་པའི་ཐོག་ནས་གཏན་འཁེལ་དང་མཐའ་འཁྱོངས་བྱས་ཏེ་ཉེན་ཟོན་སློབ་གསོའི་དམིགས་སའི་རང་བཞིན་དང་ནུས་ལྡན་རང་བཞིན་ཆེ་རུ་གཏོང་བ་དང་། ལྡོག་ཕྱོགས་ཀྱི་དཔེ་མཚོན་དང་ཉེ་འགྲམ་གྱི་བྱ་བར་བརྟེན་ནས་ཉེ་འགྲམ་གྱི་མི་དག་ལ་སློབ་གསོ་གཏོང་བ་དང་དྲན་སྐུལ་བྱེད་དགོས་ཤིང་། ཏང་ཡོན་འགོ་ཁྲིད་ལས་བྱེད་ཚོས་སྒྲིག་བཀུར་ཁྲིམས་སྲུང་གི་འདུ་ཤེས་ཆེ་རུ་བསྐྱེད་དེ་ཆབ་མདོའི་ཕྱོགས་ཡོངས་ནས་ཏང་ནན་པོས་སྐྱོང་བའི་ཆུ་ཚད་མཐོ་རུ་ཧུར་ཐག་གཏོང་དགོས་ཞེས་ནན་བཤད་གནང་ཡོད།

ཀྲོང་ཅིན་སུང་གིས་ལྕགས་རྡུང་པར་ཐོ་བ་མཁྲེགས་དགོས་ཏེ། གྲོང་ཁྱེར་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པ་དང་ལྷག་པར་དུ་འགོ་ཁྲིད་ལས་བྱེད་པས་རྟག་ཏུ་ཉེན་ཟོན་མཐའ་འཁྱོངས་ཀྱིས་རང་ཉིད་ནས་འགོ་བརྩམས་ཏེ་གཉེན་ཉེ་དང་ཉེ་འགྲམ་གྱི་མི་དག་ལ་དོ་དམ་ནན་པོ་བྱེད་པ་དང་། ཐོག་མཐའ་བར་གསུམ་དུ་དོ་དམ་ཞབས་ཞུ་བྱ་ཡུལ་དང“བདེ་འཇགས”ཀྱི་བར་ཐག་རྒྱུན་འཁྱོངས་བྱེད་པ། ལྷད་མེད་ཀྱི་བློ་མཐུན་དབར་གྱི་འབྲེལ་བ་དང་ཚུལ་ལྡན་གཞུང་དྲང་གི་གོང་འོག་འབྲེལ་བ། སྲིད་གཞུང་དང་ཚོང་པའི་དབར་གྱི་འབྲེལ་བ་གཙང་མ། ལས་བྱེད་པ་དང་མང་ཚོགས་དབར་ཞི་ཞིང་མཐུན་པ་སོགས་འབྲེལ་བ་ཡག་པོ་འཛུགས་རྒྱུར་ཤུགས་སྣོན་རྒྱག་དགོས་ཤིང་། ཆབ་མདོའི་སྤྱོད་གཙང་གཞུང་དྲང་གི་ཆབ་སྲིད་ཀྱི་སྣང་ཚུལ་བཟང་པོ་སྲུང་སྐྱོང་བྱས་ཏེ། སྤྱི་ཚོགས་རིང་ལུགས་ཀྱི་དེང་རབས་ཅན་གྱི་ཆབ་མདོའི་རྣམ་པ་གསར་པ་འཛུགས་སྐྲུན་བྱ་ཆེད་སྲ་ཞིང་བརྟན་པའི་ཆབ་སྲིད་ཀྱི་འགན་ལེན་མཁོ་འདོན་བྱེད་དགོས་ཞེས་ནན་གསུང་གནང་ཡོད་པ་རེད།

གྲོང་ཁྱེར་དམངས་འཐུས་དང་། གྲོང་ཁྱེར་སྲིད་གཞུང་། གྲོང་ཁྱེར་སྲིད་གྲོས་བཅས་ཀྱི་ས་ཁུལ་དང་གྲོང་ཁྱེར་རིམ་པའི་འགོ་ཁྲིད་བློ་མཐུན་དང་། གྲོང་ཁྱེར་འབྲིང་རིམ་མི་དམངས་ཁྲིམས་ཁང་གི་ལས་ཚབ་ཡོན་ཀྲང་དང་གྲོང་ཁྱེར་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན། བྱམས་པ་གླིང་དགོན་སྡེའི་དོ་དམ་ཨུ་ལྷན་ཏང་ཨུད་ཧྲུའུ་ཅི་སོགས་བྱེད་སྒོ་ཞུགས་ཡོད།