སྲིད་གྲོས་ཀྱི་ཨུ་ཡོན་ལིའུ་ལང་བྱུགརང་འགན་ཁུར་ལེན་གྱི་ཁྲོད་ན་ཀུན་གྱི་རྒྱན་དུ་མཛེས་པའི་མཛངས་མ།

གསར་འགྱུར་སྤེལ་དུས། 　【2024-12-24 09:00:00】

ཁོ་མོ་ནི་སྲིད་གྲོས་ཀྱི་ཨུ་ཡོན་ཙམ་མ་ཟད་བུད་མེད་ཁེ་ལས་པ་ཞིག་ཡིན་ལ་སྤྱི་ཚོགས་དང་སྤྱི་ཕན་བྱ་གཞག་ལ་མངོན་པར་དགའ་བའི་སེམས་བཟང་བུད་མེད་ཅིག་ཀྱང་ཡིན། ཁོ་མོ་ནི་ཆབ་མདོ་གྲོང་ཁྱེར་སྲིད་གྲོས་ཀྱི་ཨུ་ཡོན་དང་བུད་མེད་ཁེ་ལས་མཐུན་ཚོགས་ཀྱི་ཚོགས་གཙོ་ལིའུ་ལང་བྱུག་ལགས་རེད།

སྲིད་གྲོས་ཀྱི་ཨུ་ཡོན་བསྐོས་པ་ནས་བཟུང་། ལིའུ་ལང་བྱུག་གིས་དུས་དང་རྣམ་པ་ཀུན་ཏུ་སྤྱི་ཚོགས་ཀྱི་འགན་འཁྲི་ཕྲག་ཏུ་བཞེས་ནས་སྲིད་ཞུགས་སྲིད་གླེང་གང་ནུས་ཞུས་ཏེ། རང་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་གོང་འཕེལ་དོན་དུ་ཐབས་འདོན་ཇུས་འབུལ་བྱས་པ་རེད། དེ་ཡང་ཁོ་མོ་གཞི་རིམ་ལ་སོང་ནས་མི་དམངས་ལ་རེ་དོན་ཅི་ཡོད་རྒྱུས་ལོན་ཤེས་རྟོགས་བྱས་ཏེ་མང་ཚོགས་ཀྱི་རེ་བ་དང་དགོས་འདོད་ཐམས་ཅད་སྲིད་གྲོས་ཀྱི་ཚོགས་འདུའི་ཐོག་བསྣམས་ནས་སྲིད་གཞུང་ལ་ཐབས་ཇུས་འདོན་དུས་རིན་ཐང་ལྡན་པའི་དཔྱད་གཞི་ཕུལ་ཡོད། དེར་མ་ཟད་ཁོ་མོའི་ཚོང་ལས་ཀྱི་བརྒྱུད་རིམ་ནི་ཀུན་གྱིས་ཁས་ལེན་ཐོབ་པ་ཞིག་སྟེ། གཞན་ལ་མ་མཆིས་པའི་ཚོང་ལས་ཀྱི་རྣམ་དཔྱོད་དང་ཁྱད་དུ་འཕགས་པའི་འགོ་ཁྲིད་ནུས་པ་ལྷག་པར་ཆེ་བས་ཚོང་ལས་ཡར་རྒྱས་ཀྱི་ཁྲོད་དུ་གྲུབ་འབྲས་ཆེན་པོ་ཐོབ་ཡོད། དེ་ནི་ཁོང་ལ་ཆ་མཚོན་ན་ལེགས་འགྲུབ་ནི་རང་སྒེར་གྱི་རྒྱུ་ནོར་དང་ཐོབ་གོ་ས་ཙམ་མ་ཡིན་པར་རང་གི་ནུས་པར་བརྟེན་ནས་རོགས་རོམ་དགོས་པའི་མི་རྣམས་ལ་རོགས་རོམ་བྱ་རྒྱུ་དེ་ནི་ཀུན་ལས་མཆོག་ཏུ་གྱུར་པར་ལྟ་བཞིན་ཡོད།

སྤྱི་ཕན་བྱ་གཞག་ཐོག་ལིའུ་ལང་བྱུག་གིས་རང་ནུས་གང་ཡོད་བཏོན་ཡོད། ཁོ་མོས་སློབ་གསོ་ནི་མི་བུ་འཚར་ལོངས་དང་སྤྱི་ཚོགས་འཕེལ་རྒྱས་ངོས་ནས་གལ་འགངས་ཧ་ཅང་ཆེན་པོ་ཡིན་པ་རྟོགས་ནས་ཀྲུང་གོའི་སློབ་གསོ་རོགས་རམ་དྲ་བ་བརྒྱུད་དེ་དཀའ་ངལ་ཡོད་པའི་སློབ་མ་རྣམས་ལ་ཡུན་རིང་རོགས་རམ་བྱས་ཏེ་སློབ་མ་ཚོར་སློབ་སྦྱོང་དང་འཚོ་བའི་ཐད་ལ་རོགས་རམ་བྱས་དང་བྱེད་མུས་ཡིན། ཁོ་མོའི་བྱ་བཟང་འདི་དག་གིས་ཆབ་མདོར་ཤེས་ལྡན་མི་སྣ་མང་པོ་གསོ་སྐྱོང་བྱས་ཏེ་ཡུལ་ལུང་འཕེལ་རྒྱས་ཀྱི་དོན་དུ་གསོན་ཤུགས་དང་རེ་བ་བསྩལ་ཡོད།

ལིའུ་ལང་བྱུག་གིས་བྱ་བཟང་བསྒྲུབས་པར་བརྟེན་མི་མང་པོ་ཞིག་ཀྱང་གོ་བསྐོན་བློ་འགུགས་ཐེབས་ནས་ཚང་མ་སྤྱི་ཕན་བྱ་གཞག་ནང་ཞུགས་ཏེ་ཆབ་མདོ་གྲོང་ཁྱེར་ཡར་རྒྱས་གོང་འཕེལ་ཡོང་ཕྱིར་སྟོབས་ཤུགས་སྐྱེས་སུ་ཕུལ་དང་འབུལ་མུས་ཡིན། དེར་བརྟེན་ཁོ་མོ་ངོ་ཤེས་མཁན་ཐམས་ཅད་ཀྱིས་ཁོང་ལ“ཨ་ཅེ་ཉི་མ་ལགས”ཞེས་ཟེར་གྱིན་ཡོད། ཁོ་མོ་ནི་ཉི་མ་ལྟར་ཀུན་ལ་བྱམས་བརྩེ་ཆེ་བས་དེ་ལྟར་འབོད་པ་རེད།

སྲིད་གྲོས་ཀྱི་ཨུ་ཡོན་ཞིག་ཡིན་པའི་ཆ་ནས་ལིའུ་ལང་བྱུག་གིས་སྤྱི་ཕན་བྱ་གཞག་ཙམ་མ་ཟད་ཆབ་མདོ་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་གོང་འཕེལ་དོན་དུ་ཐབས་འདོན་ཇུས་འབུལ་གང་འོས་ཞུ་བཞིན་ཡོད། ད་ལོའི་ཚོགས་འདུ་གཉིས་འཚོག་རན་ཡོད་པས་ལིའུ་ལང་བྱུག་གིས་སྔ་ཚེ་ནས་གྲ་སྒྲིག་གང་འགབ་ཞུས་ཡོད། ཁོ་མོས་རང་གི་ལས་ཀའི་ཉམས་མྱོང་དང་བསྟུན་ནས་གྲོང་གསེབ་དར་རྒྱས་སྐོར་གྱི་གྲོས་གཞི་ཞིག་བཏོན་ཡོད།

ལིའུ་ལང་བྱུག་གི་རང་འགན་ཁུར་ལེན་སྐོར་གྱི་གཏམ་རྒྱུད་འདི་ནི་རང་རེའི་གྲོང་ཁྱེར་གྱི་སྲིད་གྲོས་ཨུ་ཡོན་རྣམས་རང་འགན་འབད་སྒྲུབ་དང་འགན་འཁྲི་འཁུར་བཟོད་སྐོར་གྱི་བསྡུས་གཟུགས་ཤིག་ཡིན། ཁོ་མོས་ལག་ལེན་དངོས་ཀྱི་ཐོག་ནས་སྲིད་གྲོས་ཨུ་ཡོན་གྱི་བསམ་འདུན་དང་འགན་འཁྲི་བསྒྲུབས་ཏེ་གྲོང་གསེབ་དར་རྒྱས་དོན་དུ་ལེགས་སྐྱེས་ཕུལ་ཡོད།