མི་དམངས་འཐུས་ཚོགས་ཀྱི་འཐུས་མི་ཉིའུ་ཅིས་ཕིང་གིས།གཞི་རིམ་དུ་ཞིང་ལས་ཞིབ་འཇུག་དང་ལག་རྩལ་ཁྱབ་གདལ་བཏང་སྟེ་ ཞིང་ལས་དེང་རབས་ཅན་ལ་རམ་འདེགས་བྱས་པ།

གསར་འགྱུར་སྤེལ་དུས། 　【2024-12-24 09:00:00】

ཆབ་མདོ་གྲོང་ཁྱེར་དུ་དུས་ཡུན་རིང་པོར་ཞིང་ཁ་དང་ཚོད་ལྟ་ཁང་དུ་ལས་ཀ་བྱེད་མཁན་ཞིང་ལས་ཚན་རྩལ་གྱི་ལས་དོན་པ་ཞིག་ཡོད། ཁོང་ནི་ཆབ་མདོ་གྲོང་ཁྱེར་ཞིང་ལས་ཚན་རིག་ཞིབ་འཇུག་ཁང་གི་སུའོ་ཀྲང། ཞིང་ལས་ལག་རྩལ་ཁྱབ་གདལ་སྤྱི་ཁྱབ་ས་ཚིགས་ཀྱི་ཀྲན་ཀྲང་གཞོན་པ། མཐོ་རིམ་ཞིང་ལས་ལག་རྩལ་པ་ཉིའུ་ཅིས་ཕིང་ལགས་རེད། གྲོང་ཁྱེར་མི་དམངས་འཐུས་ཚོགས་ཀྱི་འཐུས་མི་ཞིག་ཡིན་པའི་ངོས་ནས། ཁོང་གིས་ཐོག་མཐའ་བར་གསུམ་དུ་གཞི་རིམ་མི་དམངས་ཀྱི་རེ་བར་ཉན་པ་མ་ཟད་འགན་འཁྲི་གང་ལེགས་སྒྲུབ་ཀྱི་ཡོད། དེ་རིང་ང་ཚོ་ཉིའུ་ཅི་ཕིང་གི་ལས་དོན་བསྒྲུབ་ཡུལ་དུ་སོང་ནས་ཁོང་གི་འགན་འཁྲི་སྒྲུབ་སྟངས་སྐོར་ལ་རྒྱུས་ལོན་ཞིག་བྱེད་དོ། 

དྲོད་ཁང་ཆེན་པོའི་ནང་དུ་ཉིའུ་ཅིས་ཕིང་གིས་ཚོགས་པའི་མི་སྣ་དང་མཉམ་དུ་ཤ་མོ་སྐྱེ་ཚུལ་ལ་དོ་སྣང་ཆེན་པོ་བྱེད་བཞིན་ཡོད། ཁོང་ཚོས་སྐབས་འགར་སྐད་དམའ་མོས་སྤེལ་རེས་དང་སྐབས་འགར་སྤྲོ་སེམས་འཁོལ་པོས་གྲོས་བསྡུར་བྱས་ནས་ཤ་མོའི་སྐྱེ་རིམ་ཁྲོད་ཀྱི་དཀའ་གནད་རེ་རེ་བཞིན་མཉམ་དུ་སེལ་བཞིན་ཡོད། དྲོད་ཁང་ནང་ཚན་རིག་ཞིབ་འཇུག་གི་རྣམ་པ་ཟབ་མོ་ལྡན་པ་མ་ཟད་གསར་གཏོད་ཀྱི་གསོན་ཤུགས་རབ་ཏུ་འཕེལ་ཡོད་པ་རེད།

ཞིང་ལས་ཚན་ཞིབ་ཁྱབ་ཁོངས་ཀྱི་ཆེད་ལས་མཁས་ཅན་ཉིའུ་ཅིས་ཕིང་གིས་ཐོག་མཐའ་བར་གསུམ་དུ“ཞིང་གསུམ་འབྲོག་གསུམ”ལ་ཞབས་འདེགས་ཞུ་རྒྱུར་འབད་བརྩོན་བྱས་པ་མ་ཟད་ཚོགས་པའི་སྣེ་ཁྲིད་དེ་རྒྱལ་ཁབ་རིམ་པའི་ཞིང་ལས་ཚན་ཞིབ་རྣམ་གྲངས5དང་། བོད་རང་སྐྱོང་ལྗོངས་ཀྱི་ཚན་ཞིབ་རྣམ་གྲངས30 རང་སྐྱོང་ལྗོངས་ཀྱི་ཚན་རྩལ་འཆར་འགོད་རྣམ་གྲངས8 རང་སྐྱོང་ལྗོངས་ཀྱི་རང་བྱུང་ཚན་རིག་ཐེབས་རྩའི་རྣམ་གྲངས7 གྲོང་ཁྱེར་རིམ་པའི་ཚན་རྩལ་རྣམ་གྲངས9 མཉམ་ལས་གསར་སྤེལ་དང་རང་སོ་སོས་བཟོས་པའི་ཞིབ་འཇུག་བྱ་གཞིའི་རྣམ་གྲངས50ལྷག་ཙམ་བཅས་ཀྱི་འགན་འཁུར་བ་རེད། གཞན་ཡང་ཁོང་གིས་ད་དུང་མཐའ་འཁོར་སློབ་གྲྭ་དང་ཚན་པ་ཁག་ཏུ་ཚན་རྩལ་ཁྱབ་གདལ་གཏོང་བའི་སློབ་གསོའི་བྱེད་སྒོ་གང་དྲག་སྤེལ་ཡོད་པ་རེད།

ཉིའུ་ཅིས་ཕིང་གིས་ཚན་རྩལ་ནི་ཞིང་ལས་དེང་རབས་ཅན་གྱི་འགག་རྩ་ཞིག་ཡིན་པ་གསལ་པོ་ཤེས་ཀྱི་ཡོད། དེར་བརྟེན་ཁོང་གིས་ཞིང་ལས་ཚན་རིག་ཞིབ་འཇུག་དང་སློབ་གསོ་ཟུང་འབྲེལ་བྱ་རྒྱུར་སྐུལ་འདེད་གང་དྲག་བཏང་བ་དང་ཚན་རིག་ཁྱབ་གདལ་གྱི་སློབ་གསོའི་བྱེད་སྒོ་སྤེལ་ནས་ཞིང་པའི་ཚན་རིག་བྱང་ཚད་མཐོ་རུ་བཏང་སྟེ། ཁོང་ཚོས་ལག་རྩལ་གསར་པ་དེ་བས་ལེགས་པའི་སྒོ་ནས་ཁོང་དུ་ཆུད་པ་དང་བེད་སྤྱོད་ཐུབ་པར་བྱས་པ་རེད། དེ་དང་ཆབས་ཅིག་ཁོང་གིས་ད་དུང་དེ་བས་འཐུས་སྒོ་ཚང་བའི་གསོ་སྦྱོང་མ་ལག་དང་སྐུལ་ལྕག་ལམ་སྲོལ་འཛུགས་རྒྱུའི་གྲོས་འགོ་བཏོན་པའི་དམིགས་ཡུལ་ནི་ཞིང་ལས་ལག་རྩལ་གྱི་ཤེས་ལྡན་མི་སྣ་དེ་བས་མང་བ་གསོ་སྐྱོང་བྱས་ནས་ཞིང་ལས་འཕེལ་རྒྱས་ལ་ཚན་རྩལ་གྱི་འདེགས་སྐྱོར་ནུས་ལྡན་མཁོ་འདོན་བྱ་ཆེད་ཡིན་པ་རེད།