འབྱུང་འཕྲོད་དུས་བཟང་། འགྲོ་གྱོན་གཉིས་འཛོམས།—རང་རེའི་གྲོང་ཁྱེར་གྱིས་ལོ་འཕོ་དང་གནམ་ལོ་གསར་ཚེས་ལ་རླངས་འཁོར་གསར་པ་དང་འཁལ་འཐག་གྱོན་གོས་ཀྱི་ཐོན་རྫས་ཉོ་ཚོང་ལ་སྐུལ་འདེད་གཏོང་བའི་བྱེད་སྒོ།

གསར་འགྱུར་སྤེལ་དུས། 　【2024-12-24 09:00:00】

རླངས་འཁོར་འཚོང་མཁན་གྱིས་རླངས་འཁོར་ཉོ་མཁན་ལ་རླངས་འཁོར་གྱི་རིན་གོང་དང་གཟིགས་སྐྱོང་སྲིད་ཇུས་སོགས་ངོ་སྤྲོད་བྱེད་བཞིན་པ།

འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ12ཚེས21ཉིན། ཆབ་མདོ་གྲོང་ཁྱེར་མི་དམངས་སྲིད་གཞུང་གིས་གཙོ་གཉེར་བྱས་པ་དང་། གྲོང་ཁྱེར་ཚོང་དོན་ཅུད་ཀྱིས་འགན་སྒྲུབ་བྱས་པའི“འབྱུང་འཕྲོད་དུས་བཟང་། འགྲོ་གྱོན་གཉིས་འཛོམས”ཞེས་པའི་ལོ་འཕོ་དང་གནམ་ལོ་གསར་ཚེས་ལ་རླངས་འཁོར་གསར་པ་དང་འཁལ་འཐག་གྱོན་གོས་ཀྱི་ཐོན་རྫས་ཉོ་ཚོང་ལ་སྐུལ་འདེད་གཏོང་བའི་བྱེད་སྒོ་སྤེལ་བ་རེད།

གསར་འགོད་པས་ཡུལ་དངོས་ནས་ཤེས་རྟོགས་བྱུང་གསལ་ལྟར་ན། གྲོང་ཁྱེར་ཚོང་དོན་ཅུད་ཀྱིས་གྲོང་ཁྱེར་རང་སའི་སྤུས་ལེགས་རླངས་འཁོར་དང་གློག་སྒུལ་ལྕགས་རྟ། གྱོན་གོས་གྲགས་ཅན་དང་རང་ཡུལ་གྱི་གྱོན་ཆས་འཚོང་མཁན་སོགས་ཚོང་ཁང་དང་ཁེ་ལས12ཙམ་སྒྲིག་འཛུགས་བྱས་ནས་བྱེད་སྒོ་སྤེལ་ཡུལ་དུ་བྱེད་སྒོའི་དགོས་པ་དང་མཐུན་པའི་ཐོན་རྫས་བཤམས་ནས་ཁྱབ་སྤེལ་བྱས་པ་རེད། ཡུལ་དངོས་སུ་མི་ཚོགས་མང་ཞིང་ཉོ་སྒྲུབ་བྱེད་མཁན་ཆད་ཆད་རྫོགས་རྫོགས་མེད་ཅིང་། རླངས་འཁོར་བསྒྲིག་སར་རླངས་འཁོར་འཚོང་མཁན་གྱིས་མི་རྣམས་ལ་རླངས་འཁོར་གྱི་བྱེད་ནུས་དང་ཕྱིའི་བཟོ་ལྟ། གོང་ཚད་དང་གཟིགས་སྐྱོང་སྲིད་ཇུས་སོགས་ངོ་སྤྲོད་བྱས་པས་མི་མང་པོ་ཞིག་འཛོམས་ནས་རྒྱུས་ལོན་བྱས་པ་རེད།

བྱེད་སྒོ་སྤེལ་ཡུལ་དུ། ད་རུང་ཁམས་པའི་རིག་གནས་སྒྱུ་རྩལ་ཚོགས་པའི་འཁྲབ་སྟོན་པ་གདན་འདྲེན་ཞུས་ཏེ།《ཕུ་ཐུང་ཞབས་བྲོ》དང《དགའ་བདེའི་དཔལ་ལ་རོལ་བའི་བྲོ་ཆེན》སོགས་འཁྲབ་པ་དང་། 《གངས་རིའི་བུ་མོ》《གངས་ལྗོངས་ལ་ཕེབས་ཤོག》《མཚོ་སྔོན་པོ》སོགས་གླུ་གཞས་སྙན་མོ་ངག་གི་འགྱུར་ཁུགས་ལ་དྲངས་ཏེ་མི་རྣམས་ལ་དགའ་བའི་གླུ་དང་སྐྱིད་པའི་བྲོ་སོགས་ལྟད་མོ་གྱ་ནོམ་པ་ཞིག་བཤམས་ཡོད།

ཤེས་རྟོགས་བྱུང་བར་གཞིགས་ན། ད་རེས་ཀྱི་བྱེད་སྒོ་འདི་ཉིན་གཉིས་ལ་སྤེལ་ཡོད་པ་དང་། བྱེད་སྒོའི་ནང་ཞུགས་མཁན་ཚོང་ཁང་དང་ཁེ་ལས་ཚོས་དྲ་ཐོག་ནས་ཅ་ལག་འཚོང་ཡོད་པ་རེད། ཚོང་ལམ་རྒྱ་སྐྱེད་བཏང་ནས་ཆབ་མདོའི་འཛད་སྤྱོད་པ་རྣམས་ལ་ཚོང་ཟོག་སྤུས་ལེགས་མང་པོ་མཁོ་འདོན་བྱས་པས། ཉིན་དེར་སྒོར891677ཙམ་ཚོང་ཕོག་ཡོད་པ་ལས་རླངས་འཁོར་དྲུག་ཙམ་ཚོངས་ནས་ཚོང་དངུལ་སྒོར867500ཙམ་ཟིན་ཞིང་སྲིད་གཞུང་ནས་ཁ་གསབ་སྣ་ཁ128རག་པ་ལ་མ་དངུལ་སྒོར45840ཟིན་ཡོད། དེ་བཞིན་འཕྲུལ་སྣུམ་བླུག་བྱེད་ཀྱི་སྒོར11000ལེན་ནས་འཛད་སྤྱོད་བྱས་ཤིང་། སྒོར475956ཙམ་ཚོང་འགྲིག་ནས་འཛད་སྤྱོད་ཐུབ་ཡོད་པ་རེད།